2015年港姐亞軍龐卓欣拍片分享當年選美經歷 曾被追訪記者嚇親一度萌生退選念頭

TVB年度盛事《2024香港小姐競選》次輪面試喺下月2日展開，而較早前嘅首輪面試日，不乏高質及比較騎呢嘅佳麗亮相，隨即成為網民茶餘飯後話題。2015年港姐亞軍龐卓欣早前亦有拍短片上載到小紅書，與網民分享當年嘅選美經歷。

喺影片中，龐卓欣一路化妝一路分享當年嘅選美經歷，佢指當年搭車去到TVB電視城嘅時候，佢就已經被車外追訪嘅記者嚇親，令佢有一度萌生退選嘅念頭，因為佢未試過經歷呢啲場面，所以當時佢見到咁多記者過嚟影相，佢當下就諗住即刻縮沙。佢仲驚到匿喺座位下，同埋打電話俾媽媽話自己唔想繼續參選。不過媽媽就鼓勵佢要勇敢嘗試，而佢亦好慶幸媽媽當時嘅意見唔係叫佢走，從而改變人生嘅方向。佢仲表示如果當初自己冇參加港姐競選，佢而家都唔會做到KOL，或者教唱歌都可能會難啲有學生。

家底豐厚嘅龐卓欣，爸爸係基金經理、股評人兼東驥基金管理董事總經理龐寶林，而佢喺爸爸嘅資助下，2015年以約1200萬元購入銅鑼灣一個700呎單位，成功上車。佢喺2015年參加港姐競選，當時被視為大熱門之一嘅佢，最終勇奪亞軍，不過佢未有與TVB簽約，反而選擇做KOL，喺網上分享護膚美容心得及生活日常，同時佢仲係一位教小朋友唱歌嘅音樂老師。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！