2021年日本最美女大生＆最帥男大生出爐！東大石原聰美榮登冠軍

日本每年都會舉行好多大大小小嘅選美賽事，雖然新冠肺炎疫情持續，但依然無阻「Miss of Miss CAMPUS QUEEN CONTEST 2021」（最美女大生選拔賽）及「Mr. of Mr. CAMPUS CONTEST 2021」（最帥男大生選拔賽）嘅比賽進行。呢個比賽參加者係各大學選出嘅校花和校草，參加者需然與全國各大學代表進行評選，最後選出全日本最美及最帥大學生，冠軍得主可獲得100萬日元嘅獎金及出演電視廣告嘅機會。比賽噚日（2日）喺東京都舉行，結果由東京大學嘅神谷明采及立教大學嘅鈴木廉榮登冠軍。

現年20歲嘅神谷明采，就讀東京大學教養學部文科2類1年級。佢唔單止讀書叻，仲識體操、跳舞及彈琴，真係多才多藝呀！佢喺上年獲選東京大學小姐，然後喺網絡投票成功打入十強，最終擊敗其他大學嘅九位校花，成為今年最美大學校花得主。唔少網民都大讚佢樣子清純同好有氣質，仲有幾分似石原聰美。神谷明采就話好多謝大家嘅支持，雖然仲未有具體嘅目標，不過就好希望可以挑戰新事物，當中包括加入娛樂圈，希望可以將歡樂帶畀大家。至於100萬日元嘅獎金，佢就話會用呢筆錢同屋企人去京都旅行。

而22歲嘅鈴木廉，就讀立教大學經濟學部4年級。佢除咗成績優異之外，仲好有運動天份，試過踢入日本全國高校足球賽嘅埼玉區預選賽。喺上年成為立教大學校園先生，同樣喺網絡投票打入十強，最終成功擊敗其他大學嘅九位參加者，成為今年最帥大學校草得主。鈴木廉表示非常感激所有支持佢嘅人，因為佢將贏得比賽視為目標已經一年，所以好開心可以實現到。佢仲話會繼續全力以赴，實現佢喺比賽時建立嘅音樂夢想。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！