3人撐起一集 播舊片攝時間 《愛．回家》疫下「縮水」 呂慧儀滕麗名追進度

《愛．回家之開心速遞》被爆疑受疫情影響致存貨不足，有幾集僅得3個演員作有限度演出，加插舊片剪輯而成便播出。而呂慧儀終認搵前輩向高層幫「老公」張景淳求情，但他昨日依然冇份宣傳。

無綫處境劇《愛．回家之開心速遞》演員劉丹、呂慧儀、滕麗名、湯盈盈、蘇韻姿、林淑敏、古佩玲等，昨日趁世界地球日，在將軍澳電視城進行「來吧，愛護地球！」活動，宣揚環保。

早前的第5波疫情令不少劇集拍攝受影響，前晚播出的一集《愛》，只有劉丹、滕麗名及李偉傑3名演員，更加插不少回憶片段剪輯而成，不少網民質疑是否劇集存貨不足！滕麗名對此說：「唔係冇存貨，呢集係疫情最嚴重嘅時候拍，劇組為咗大家安全，決定用最少演員，呢集只得4個人，連攝影師都要做埋臨時演員，而最少一集更加只有3個演員，得我、袁文傑同倪嘉雯，就係講全個世界冇晒人，真係辛苦編劇度劇本。」她笑言進度好似永無休止，追趕極也沒有存貨，呂慧儀亦有同感，笑說：「冇停止過追逐！」

張景淳依然冇影

早前張景淳因遲到問題被飛出《愛》，有指全靠劇中老婆呂慧儀求情才能重返劇組，但昨日仍未見他現身，呂慧儀說：「我成日都叫阿爸（劉丹）幫口，因為我最接近嘅高層就係丹爺喇！會嘅，我都希望佢快啲返嚟，大家密切期待。」劉丹則指大家也有為張景淳幫口，希望他能早日「回家」。