Frankie＠MIRROR女友Christy再現IG 聲稱被改圖老屈 指有人想「搞死我男朋友同MIRROR」

MIRROR成員Frankie（陳瑞輝）去年底承認展開新戀情﹐6月時女友Christy更浮上水面感謝fans令身份曝光，但網上隨即有多張Christy個人IG截圖，指證Christy私生活不檢點，多次做第三者之餘更涉嫌令Frankie同隊友AK江𤒹生陷入疑似「爭女風波」之中，Christy又被指喺Frankie同前女友Hei拍拖期間介入，Frankie頓然被指責成「偷食渣男」！

近期風波稍為平息，今日生日嘅Frankie繼續得到皮寶寶(Frankie Fans稱呼）支持﹐舉辦生日展等應援活動。但另一方面，有報導指一度封閉IG帳戶嘅Christy，近日重新開放帳戶，並且發長文指早前個人IG截圖流出事件，係有人改圖老屈佢，簡直係喺Frankie生日贈慶。

Christy指自己身邊有人喺佢IG截圖，到2021年9月Christy得知個人照片喺討論區流傳，甚至曾被改圖誣蔑，由於部份相片已經刪除，所以Christy估計係熟人所為。後來Christy聽從朋友意見從IG「捉內鬼」，並將同認識無耐嘅Frankie網上對話截圖放上IG story只係俾熟朋友睇，從而「捉鬼」。Christy話當時同Frankie提到「捉鬼」一事，Frankie亦願意幫手，並按Christy指示send相同錄音俾Christy。到2022年1月，Christy發現到自己同Frankie對話截圖真係俾人放上網，於是將「疑犯」踢出IG友好名單。

Christy以為事件平息，點知到6月公開身份之後，佢發現用嚟「捉鬼」嘅內容喺網上流出，部份係改圖甚至捏這內容。Christy直斥有人立心不良，「佢一直處心積慮，由原本淨係想搞死我，去到而家夾埋外人，想搞死埋我男朋友及MIRROR。」

至於點解咁大仇口？Christy懷疑係因為做傳銷。「佢講過佢家人曾經做傳銷，俾人呃完幾十萬搞到有人上門追數。當佢知我俾前男友拉咗入去做之後，就投射個憎恨落我身上」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！