雅虎香港新聞 Froyo熱潮回歸！香港5間乳酪雪糕推介+健康小貼士
夏日炎炎想消暑，一杯冰凍嘅Froyo就最啱！今年又有乳酪雪糕新店登場，唔少都主打多款配料同醬可以畀大家隨喜好配搭。亦有標榜低卡低脂又有益生菌嘅乳酪雪糕。想食得開心又健康，記得留意埋文底嘅健康貼士啊。
酥皮+脆脆加分 Frozen Yogurt Drool
5月中進駐尖沙咀嘅新店，乳酪雪糕有250mL同360mL兩個大細，21款配料同六款醬選擇。最特別嘅係有酥皮筒，外脆內軟嘅酥皮同清爽嘅乳酪雪糕好夾！配料方面唔少人推介佢哋嘅麻糬，口感Q彈幾好咬。咖啡蛋白霜糖同黃金焦糖脆脆就啱打卡又香脆。
葵廣最新Froyo店 What’s Yogurt and Drink
掃街熱點葵涌廣場4月新開嘅乳酪雪糕店，暫時得一個大細，可以自選兩或四款配料加一款醬，配料有新鮮水果、果乾、曲奇、朱古力、脆脆等。大部分食評指乳酪雪糕口感夠滑，而且好重乳酪味，酸甜平衡。配料方面風乾菠蘿片同蝴蝶酥大大塊夠搶鏡，綠茶糯米糍就夠軟糯。
真·希臘乳酪雪糕 小滿定律
呢間Froyo小店由西貢開到去西營盤，靠嘅就係主打選用真·希臘乳酪而唔係希臘式乳酪，前者牛奶成分更高，蛋白質更多之餘口感亦更濃厚，令乳酪雪糕食落亦更Creamy！佢哋供應200g嘅杯裝同100g嘅筒裝，加上22款配料同四款醬選擇，不時更有期間限定。
賣相精緻Froyo杯 Smile Yogurt & Dessert Bar
由知名蛋糕甜品師Tony Wong主理嘅乳酪雪糕店，比起自選配料，更多人會選擇12款配搭好嘅Set，配料豐富加上色彩繽紛，未食先興奮啊。例如Wild Summer就有菠蘿脆片、荔枝、芒果等夏天必食嘅水果，再加脆粒增加口感層次。亦有綠茶、香蕉朱古力等主題配搭。
Super+益生菌乳酪 Mama Frozen Yogurt
呢間Froyo店主打低脂高鈣同含有豐富益生菌，選用Super+益生菌配方乳酪，而益生菌有改善消化同增強免疫系統功能嘅作用！而且佢哋選擇都好多元化，有普通杯、大杯、甜筒、五或六層芭菲選擇，連乳酪都有原味同特別口味，好似最近就係藍色嘅Mermaid Froyo。
食得健康 要注意分量+配料選擇！
每間Froyo店嘅乳酪雪糕配方同營養數值都各有不同，參考返香港食物安全中心嘅資料庫，標明低脂嘅乳酪芭菲的確比一般雲呢拿雪糕低脂同低卡。但要注意嘅係為咗平衡乳酪嘅酸味，坊間一般乳酪雪糕嘅糖都落得唔少，係天然乳酪嘅兩倍有多！
配料同醬方面，有營養師建議盡量選擇新鮮水果、乾果、原味燕麥、果仁等，減少朱古力、曲奇、糖漿、糖果或者浸住糖水嘅水果等高糖高熱量選擇。當然，亦可以選擇同朋友分享，老土啲講句，「少食多滋味」吖嘛。
文：Cathy.H
