IT狗︳Johnny仔鄧子超患罕見病受盡歧視 入行真係關馮德倫事

ViuTV劇集《IT狗》近期備受網民熱捧，劇情圍繞創投、創新科技等話題，演員除咗有陳漢娜、凌文龍、岑珈其、MIRROR成員楊樂文(Lokman)、陳瑞輝(Frankie)及邱士縉(Stanley)以外，飾演Johnny仔嘅鄧子超（小B）都十分搶眼。劇情提到Johnny仔為凌文龍飾演嘅葉念信創作公司設計logo，後來佢將畫作以NFT出售而勁賺千萬，仲成為共享平台BornHub老細！現實中嘅Johnny仔一樣充滿奇遇，一切都由佢嘅出生講起。

今年36歲嘅小B未出世前就被診斷有「先天性軟骨發育不全症」，屬於其中一種「侏儒症」，出世時同其他BB冇分別，但係成長之後開始出現身型差異。小B成年後身高只有4呎多啲，不過身體機能同智力同正常人一樣。

外型同其他人不一樣，自然有不一樣嘅遭遇。小學時小B寫《我的志願》係做警察，竟然俾老師反問佢「你夠高咩？」；去內地旅行，俾其他旅客當成「景點」影相留念，父母同人打起上嚟。因為介意人地點睇，小B開始學壞，食煙、走堂，又因為對未來迷茫諗過輕生。後來因為腰痛要住院一年，媽媽日日探望，令小B決心走出谷底，並且開始喺屋企人開嘅茶餐廳幫手。

《IT狗》入面，凌文龍等人以為創業比賽評審（彭秀慧飾）係馮德倫fans，並以此爭取好感。原來小B入行都同馮德倫有關！小B為興趣而參演大學生短片拍攝，短片嘅美術指導後來介紹小B俾馮德倫識，因此有機會拍攝馮為陳奕迅執導嘅MV。自此小B參與無數演出，由主題公園扮鬼到短片、硬照拍攝都有份，早幾年張家輝執導嘅《陀地驅魔人》仲搵小B演「線人」。可惜喺2016年，小B綵排演出時受傷，加上腰痛復發，佢決定暫別娛圈重返餐廳，直至拍攝《IT狗》先「復出」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！