MIRROR ERROR成員餐廳結業 餐飲集團被爆資金流向有可疑 苦主肥仔鬧爆︰有人係慣犯

早前男團MIRROR同ERROR成員柳應廷(Jer)、李駿傑(Jeremy)、江𤒹生(AK)以及ERROR隊長肥仔(梁業)投資嘅日式高級料理及串燒店相繼結業，更令幾位星級股東被人貼街招追數，據報各人損失高達7位數字！

有傳媒報導，原來苦主唔止幾位藝人。據報，拉攏幾位鏡仔同肥仔合作嘅係一間餐飲集團，而該集團姓葉高層游說公司職員嘅媽媽借400萬以營運公司，並聲稱轉讓旗下餐廳2成股權作感謝。但今年5月MIRROR成員Jer、Jeremy同ERROR肥仔喺將軍澳嘅日式料理店結業，公司亦開始出問題，2位高層相繼辭職。

至於被借款400萬嘅職員媽媽，聲稱只係收到100萬還款，更發現獲轉贈股份嘅餐廳股東名單上根本冇借款人個名，卻成為另一間日本餐廳股東。更慘係，借款人「被出任」為股東嘅餐廳出現財務問題，令佢受到追債恐嚇信滋擾。

令家人蒙受損失嘅餐飲集團職員，聲稱搵到公司嘅銀行月結單，發現公司帳戶有錢存入後冇耐就被轉走，令佢聯想到點解幾間有MIRROR同ERROR成員做生招牌嘅食肆生意唔錯，最終都要拖糧走數。

報導指苦主之一肥仔回應時直斥「有人係慣犯」，佢已經聯絡唔到涉案餐飲集團負責人，更點名姓葉高層將佢同MIRROR成員嘅個人號碼外洩，令佢地俾人追數，而且涉及嘅公司聽都未聽過，似乎遭遇同餐飲集團職員類似。肥仔仲爆料話，有人利用佢地幾個藝人嘅名義，懷疑捲走過千萬元。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！