湯盈盈誕7磅3千金 嘉樂：過程似拍動作片

【晴報專訊】恭喜！恭喜！錢嘉樂和湯盈盈的女兒Alyssa出世了。兩人昨午在半山嘉諾撒醫院會見傳媒，宣布BB女已於周日（10日）出世，重7磅3安士。全程在產房見證女兒出世的嘉樂，激動灑下男兒淚，笑言整個過程像拍動作電影，溫馨又刺激。 昨午二時，錢嘉樂拖着太太湯盈盈現身嘉諾撒醫院門外見傳媒，素顏的盈盈精神奕奕，步履自如，但腹部依然巨大。在記者連聲恭喜下，嘉樂難掩喜悅：「好似發緊夢咁！」 他透露盈盈是在大前日（10日）早上六時許入院，中午12時30分採用自然分娩誕下女兒，全程陪伴在側的嘉樂表示：「原本我諗住好似睇劇集咁，在醫院走廊等產房門外熄燈才入去，但姑娘迫我入去，成個過程好似拍動作片咁。我發揮動作片導演本色叫佢畀心機，又提佢唔好用錯力回氣，我仲有親手剪臍帶。」身旁的盈盈則踢爆嘉樂：「佢剪臍帶時要我幫佢攞相機影相。」 惡搞B女叫「錢晴」 嘉樂大讚盈盈順利誕下女兒十分叻女，盈盈坦言：「都唔算痛太耐，好開心，依家餵緊人奶。」嘉樂用三個英文字「Amazing」、「Incredible」及「Wonderful」來形容做爸爸的心情。他又說當聽見BB女呱呱落地的哭聲時，盈盈竟也哭得像「噴水池」，嘉樂則是「小小噴水池」。 至於女兒像爸爸還是媽媽？嘉樂表示分成兩派：「護士話似爸爸，咁咪即係似盛女Bonnie？婆婆和嫲嫲就話似媽咪，當然似媽咪好，女兒眼睛都算大。」提到BB的英文名在出世前已取名Alyssa，中文名則會交由爺爺改。但搞笑的嘉樂竟惡搞說，如果生仔叫「錢進」，生女就叫「錢晴」。 努力追個男丁 其實嘉樂和盈盈都喜歡小朋友，故希望日後再追多個兒子。嘉樂又指女兒出世後，已第一時間通知家人、「獎門人」曾志偉及洪金寶，身邊好友得悉他誕女亦紛紛送上禮物，劉德華送上一袋BB新衫、嬰兒車及嬰兒私家車座椅。 最後，二人接受完訪問，盈盈在嘉樂陪伴下於三時半出院，BB女則由秘密通道離開。 採訪：林常恩 協力：Joyce 攝影：Lego