Supper Moment現身TVB《開心大綜藝》惹網民反感：唔會再支持你地

2013年憑住歌曲《無盡》而受到唔少年輕人追捧嘅樂隊Supper Moment，自上年年尾舉行完網上音樂會後，有一段時間都十分低調。但近日Supper Moment 四子竟然上咗無綫嘅《開心大綜藝》，仲同89歲胡楓Jam歌，唱咗幾首80／90年代歌曲，包括《舊歡如夢》、《紅日》及《我的親愛》。

明明大家認識嘅Supper Moment係行熱血同Rock and Roll路線，但而家竟然咁懷舊，佢哋仲會喺6月做修哥紅館演唱會嘉賓。一眾網民即時去佢哋社交網站留言，紛紛鬧爆佢哋同以前唔一樣，例如 「見到你哋搞成咁，其實笑唔出，因為曾經都真係好鍾意你哋，不過條路係你哋自己揀」、「上tvb 做小丑」、「條路自己揀，第時趴街唔好喊。」、「真系好失望 唔會再支持你地」、「為五斗米折腰，可悲。」及「記唔記得以前你地係點樣？」等等。

另外，有網友喺Supper Moment IG見到佢哋只放Chill Club嘅相，即時問佢哋「上TVB好唔見得光咩？去胡楓演唱會做嘉賓啦」。其實近年Supper Moment為打入大陸市場而推出國語歌，早前又喺亞洲流行音樂節同特首林鄭月娥合照，今次上《開心大綜藝》又引發網民熱烈討論。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！