《十八年後的終極告白》楊秀惠好友Jackie獲網民關注 孟希璘戀KOL李寶珊公開同性關係

無綫懸疑劇《十八年後的終極告白》愈來愈緊湊及精彩，飾演「啞妹」阿倩一角嘅楊秀惠好戲就唔使講，連佢劇中好友Jackie（孟希璘飾）亦好搶鏡。

劇中孟希璘（Ball）飾演嘅Jackie係阿倩嘅好朋友，經常喺佢身邊支持佢，就算落大雨阿倩要喺差館門口等阿一（陳山聰飾），Jackie都會除低外套幫佢擋雨兼陪伴在側。劇中佢一頭短髮，以中性外表示人，形象比較男仔頭。孟希璘係第29期無綫電視藝員訓練班學員，畢業後就加入無綫，更參演唔少劇集拍攝，包括《愛·回家之開心速遞》、《鐵探》、《金宵大廈》、《解決師》及下星期播出新劇《降魔的2.0》等等。

至於感情方面，佢嘅另一半係《後生仔傾吓偈》KOL李寶珊，佢哋喺今年情人節於社交網站公開同性關係，李寶珊留言話「情人節快樂，I Love You!」佢哋愛得咁高調，好多人都擔心一向作風保守嘅無綫會唔滿意。有傳媒引述無綫助理總經理（藝員管理及發展）樂易玲的回應，樂小姐表示孟希璘面試藝訓班時已向佢哋坦白，更話佢哋冇將此作為收生考慮條件，不應受性別等規限。