心理學權威顧修全博士肺炎逝世享年73歲 曾活躍於幕前中分造型深入民心

香港著名心理學權威顧修全博士，喺11月29日因肺炎逝世，享年73歲。

顧修全博士出身於裁縫世家，不過對心理學興趣，喺香港大學完成心理學學士及碩士課程，畢業後投身監獄署（現稱為懲教署）擔任臨床心理學家，之後再自己成立私人心理諮詢中心。佢喺80至90年代活躍於各大傳媒，不時亮相電視節目《歡樂今宵》、《點解香港咁過癮》及《靈通天地綫》，而佢最為觀眾所認識嘅一定係佢標誌性中間分界造型。顧修全博士曾經喺1992年於Do姐鄭裕玲主持嘅《鄭裕玲星夜傾情》指出佢從周星馳嘅面形指出周星馳嘅無厘頭係一種無奈同唔開心，同時仲話佢上進心好強，所以唔會屈居喺別人之下，唔鍾意被人操控，將來會做老闆。而周星馳而家已經係首屈一指嘅電影及娛樂界代表及比高集團執行董事，所以唔少人都認為佢係神預言。不過佢喺晚年一改高調作風，冇再亮相於電視節目。

有指顧修全博士喺今年證實患上肝癌，並由肝臟科權威范上達教授及陳詩正教授聯手操刀，將腫瘤成功切除。顧修全博士喺康復後前往日本接受癌症治療專家林麗君博士及腫瘤科醫生藤田成晴細胞免疫治療，目的係防止癌病復發。不過早前佢曾確診新冠肺炎，導致肺功能衰退，最終不敵肺炎離世，據講佢彌留時喺家人及徒弟陪同下安詳離世。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！