童你一起長大了︳張沅薇舊愛係MIRROR御用監製 做OL酒樓知客獨力湊大仔仔

TVB節目《童你一起長大了》搵一班曾經主持兒童節目嘅前藝人現身，最新一集嘉賓有「Amy姐姐」張沅薇。48歲嘅Amy雖然冇做幕前多年，但係仍然keep到凍齡靚樣，今次上節目之後應該再有機會喺電視見到佢。

張沅薇係鄭少秋視為恩師嘅資深藝人良鳴（趙良鳴）外孫女。八、九十年代唔少女藝人都係由平面模特兒出身，Amy當年拍過唔少雜誌造型照，後來加入TVB，先被安排做《閃電傳真機》，最出名嘅角色就係「吱吱鼠」。之後張沅薇被調到戲劇組拍劇，最為人記得係《刑事偵緝檔案II》做其中一個篇章嘅女主角，而呢個角色就係殺死義仔（梁榮忠飾）老婆Gigi（蘇玉華飾）嘅兇手。

Amy 90年代末期離開TVB，同為陳奕迅、容祖兒以及MIRROR製作過多首歌曲嘅王雙駿拍拖，佢地仲有一個仔仔。不過後來Amy 同王雙駿分開，小朋友由Amy照顧，身為單親媽媽嘅Amy冇重返幕前搵食，而係做秘書、牆紙客戶推廣甚至酒樓知客維生。早幾年有記者去酒樓訪問Amy，佢話要照顧家人唔會復出，不過到早排拍《童你一起長大了》受訪時就話唔介意復出做路人甲，因為成隊人拍攝好開心。各位監製，識做啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！