蛇叔：「內涵唔錯可惜唔係 One M7 樣」- HTC One A9

蛇叔

更新日期： 2015年11月25日上午5:30

HTC 正式發表 One A9，雖然佢唔算旗艦機，但討論嘅人依然好多，原因無非都係設計實在太似 iPhone 6，但實情係咪真係如想像咁呢？就等蛇叔同你試下！

比國產機更似 iPhone！手感更佳

相信好多人見到 One A9 第一時間都係聯想到 iPhone 6，雖然外觀相似，但只要拿起好奇地可說出兩者分別，當中我覺得最明顯係手感。體積上 One A9 係比 iPhone 6 /6s 大部，但由於中框設計得較直身，拿起更貼手，而重量同屬143g，令重量分佈得更平均，甚至有 One A9 更輕的錯覺。其次，仲有少少驚喜的還有用了凹凸設計的電源鍵，即使首次拿起都清楚識辨那種按鍵。

▲ One A9 似唔似 iPhone 6？我就覺得似囉！

▲ 5 吋屏幕機身稍大過 iPhone 6 / 6s ，但拿起感覺更舒服，單手操作亦冇難度。

▲ 主要分別在於中框相對直身，手握時感覺更貼手。

規格唔快但最新！完全唔熱

One A9 唔算旗艦機無非都係規格，因為機內僅搭載 Qualcomm Snapdragon 617 處理器，架構同為 4+4 八核心，同 Snapdragon 615 差比只係時脈高低 (1.2GHz + 1.5GHz)，於 Antutu 可錄得約 41,000 分，而重點分別係 Modem 升級支持 LTE-A 300Mbps 下載，並支持中港 4G 制式。此外，機內配備 3GB RAM / 32GB ROM (另有 2GB / 16GB 型號) ，可插 MicroSD，但不設 Dual SIM 設計。

▲ 搭載 Qualcomm 最新 Snapdragon 617 處理器及 3GB RAM。

▲ 於 Antutu 錄得約 41,138 分，成績僅次於 Note 4。

▲負載時機背亦只係微暖，散熱控制做得好好！

▲ 3GB RAM 閒置時大約有 1.7GB Free RAM。

▲ 32GB 儲存空間大約有 24GB 可用。

▲ 機旁設 Nano SIM 卡及 MicroSD 插槽。

▲ One A9 本身對應 Quick Charge 3.0 規格 (須稍後軟件更新)，但現時使用 Quick Charge 2.0 充電器都有快速充電效果，但就無任可提示。

▲ 試用時間唔長，但在省電模式電池估計都可用 8-10 小時，以 2,150mAh 電量來計算係幾意外…

屏幕改用 AMOLED！無咗 BoomSound

One A9 另一個意外改動係改用 AMOLED 屏幕， 5 吋擁有 1080p 解像度，驟眼睇都好細緻，顏色比 Note 5 再微微偏黃少少，冇跟 Samsung / Sony 刻意增強鮮艷度，亮度跟 Note 5 睇齊，而且表面 Gorilla Glass 4 非常通透，但打斜睇屏幕會偏藍，這方面 Note 5 冇類似情況。不過，最令我失望係睇片再冇 BoomSound（前置喇叭) 享受，因為喇叭改成單聲道設機底，取而代之係 Dolby 特效，但就必須用 Headphone 才能啟用，效果係幾明顯，但始終唔係喇叭….

▲ One A9 顏色屏幕 Note 5 接近，只係整體感覺灰少少。

▲打側睇屏幕雖變成偏藍，不同角度都有相同情況。

▲ 想顏色再偏黃一點可使用 sRGB 模式。

▲ 喇叭改為設置於底部，變成單聲道。

▲ 附 Dolby 音效，但必須配合耳機使用。

Sense UI 配合得唔錯！指紋解鎖快

雖然 One A9 規格普通，但佢最強賣點反而係軟件方面。首先，佢係 Nexus 5X 及 6P 以外首款原身 Android 6.0 機種，新版系統操作固然順暢，但加埋 Sense UI 就令原本唔太完善嘅原身介面補完，當中包括 Multi Task 加返 Clear All、追加省電模式及客製相機介面等等，感覺就如當年 HTC Magic 咁…此外，為配合 Android 6.0 保安功能，屏幕下方亦設指紋 Sensor，情況跟其他新機一樣都係一觸就解鎖，速度唔比「親生仔」慢。

▲ 預載 Android 6.0 及 Sense 7.0 。

▲ 主頁介面可跟地點作個人化。

▲ 右版設 BlinkFeed。

▲ 提供省電及究極省電模式。

▲ 可註冊多達 5 組指紋。

▲ 輕觸下就隨即解鎖。

▲ 除了指紋辨識，還是主頁快捷鍵。

對焦反應一般！質素唔及 M9++

近期 HTC 機啲鏡頭轉完又轉，「One M9+ 相機升級版」之後今次 One A9 又改用 1,300 萬像素鏡頭，特色係 F2.0 光圈及第 2 代 OIS 防震。首先，我發現 One A9 對焦唔算好快，夠光都 0.5-1 秒，唔夠光就更耐，速度比「One M9+ 相機升級版」較慢，幸好 Save 相速度保持到，但一開 HDR 又會慢下來。質素方面，日景拍攝不過不失，細節清楚但唔太銳利（解像力一般），而且 ISO-100 都見到暗位有雜訊。夜間拍攝情況就更嚴重，唔放大都感覺到雜訊存在，細節稍為流失，但就冇刻意 NR 而被油畫，其次係快門略為太慢，即使有 OIS 快門慢至 1/6s 手持都會間中會失手。(總結：Note 5 / M9+ 升級版 > One A9)

▲ 提供專業 Raw 模式，可調整快門、ISO 及手動對焦。

▲ 對焦速度普通，但勝在 Save 相夠快。

▲ 日景拍攝曝光準確，細節清楚但唔算好 Sharp，而且暗位雜訊較明顯。

▲ 夜景拍攝白平衡及曝光正常，但缺點係快門低至 1/6s，手持手震風險較高。放大放面，One A9 雜訊相對較明顯，

▲ One A9 放大圖。（ISO 781 / F2.0 / 1/6s）

▲ One M9+ 相機升級版放大圖。(ISO 320 / F2.2 / 1/8s)

▲ Galaxy Note 5 放大圖。(ISO 400 / F1.9 / 1/10s)

▲ 在較暗反差較大環境，唔放睇都見到明顯雜訊。