全民造星5︳AK Lokman＠MIRROR 肥仔 阿Dee＠ERROR 溫哥華吉隆坡揀師弟 花姐自爆唔使做監製

ViuTV王牌節目《全民造星》今日開記者會公布即將舉行嘅第5季詳情。今季將會喺香港、吉隆坡同溫哥華舉行招募，同之前傳過會去英美等地選秀，規模細得多。公開招募由今日至8月11日進行，而製作單位MakerVille將會派出ERROR嘅肥仔（梁業）同阿Dee（何啟華）去吉隆坡揀蟀，MIRROR嘅正副隊長Lokman（楊樂文）及AK（江㷸生）就會負責溫哥華部份。

記者會上，《全民造星》頭4季嘅監製花姐自爆今季唔使做監製，又話每年完咗個show都想唔做，只係被高層魯庭暉迫，不過節目多年來產生咗MIRROR、ERROR、P1X3EL、COLLAR及MC張天賦等樂壇生力軍，令佢覺得節目做到「俾香港人希望」嘅宗旨。

有份揀人嘅肥仔就希望搵到高過193或者矮過自己嘅人選，花姐就話以往會揀靚仔靚女，但係同場嘅肥仔同阿Dee証明咗佢地雖然外表唔得，但係一個係排舞老師一個有創作才華，令佢認為有熱情比起個樣更重要。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！