吳浩康自資6位數明年出歌 自爆經濟已改善可為好友張致恒介紹工作

歌手吳浩康（Deep）去年底與英皇娛樂結束20年賓主關係，為養家不惜轉行做地盤工人。日前吳浩康喺接受傳媒訪問時表示自己多咗演藝工作，現時地盤工作少咗20%；同時又會幫朋友做到會工作。被問到係唔係賺錢少咗時，佢就話要轉型，而佢亦想去港鐵考一個可以落路軌嘅工作證，可能喺夜晚11點湊完仔就去路軌返工，直至到第二朝。

吳浩康早前遠赴澳州進行街頭表演，佢就話自己其實係去報道會同埋傳教，喺同當地朋友傾偈時得知大家有思鄉，所以佢就即席做街頭表演等大家開心一下。佢亦提到有人話佢『唔係沒錢的咩？點解咁有錢飛去澳洲做Busking？』而佢就表示係一個誤會，因為機票係人哋買，而佢嘅經濟及工作狀況已經大有改善，多謝大家嘅關心。同時佢亦提到不少建築工友開工不足，而昔日同門兼好友張致恒（Steven）遇到同一情況，再一次喺網上求助，Deep就話佢同Steven都係男人，男人之間一般都係等對方有需要先開口，到時再睇下點樣去配合。被問到會唔會介紹Steven開工，Deep就話如果有客人有興趣搵到佢，佢都會介紹。

另外，吳浩康透露自己嘅出歌計劃，透露將於明年新年後推出三首歌，而佢今次想出慢歌及輕鬆嘅歌，並表示雖然已經有朋友嘅幫手，不過出歌嘅預算都要大約係30－40萬。Deep仲話而家自己純粹係想分享音樂，自己係支持樂壇及冇任何企圖，所以唔會參與頒獎典禮，更笑話呢個遊戲唔啱佢呢個年紀嘅人玩。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！