正義女神｜佘詩曼疑為新劇開工路透照曝光 入行多年終如願以償演律師

佘詩曼（阿佘）去年憑劇集《新聞女王》「Man姐」文慧心一角深受觀眾喜愛，以大熱姿態奪得「最佳女主角」、「馬來西亞最喜愛TVB女主角」」及「大灣區最喜愛TVB女主角」，成為TVB史上首位三料視后。9月底出席公開活動時曾透露收到新劇本，指覺得題材好吸引，不過仍睇𡁵劇本。有指，阿佘所指嘅就係劇集《正義女神Themis》，並疑似已於近日為劇集開工拍攝。

於《TVB同行創新節目巡禮2025》中，TVB介紹來年將於翡翠台、TVB Plus、明珠台等頻道播放嘅王牌節目，其中律政劇《正義女神Themis》以「神秘女主角」介紹主演，當時就有傳神秘女主角係阿佘。近日，有內地網民分享阿佘現身深圳拍攝嘅影片，疑似曝光新劇律師造型，阿佘以一頭短髮示人，穿上黑色西裝及戴眼鏡，尊業又型格；曾於受訪時表示拍劇多年來從未飾演過律師角色嘅阿佘睇嚟今次終於如願以償。

《正義女神Themis》以律政作題材，由鍾澍佳監製，演員包括譚耀文、周嘉洛、陳煒、許紹雄、蔣祖曼、戴祖儀及馬貫東等等。據悉，劇集於當地搭建咗法庭及辦公室場景，而其餘戲份主要會返港取景拍攝。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！