關心妍跑5K當馬拉松 保錡出post指正被指暗寸 大台體育王子長文解釋

星期日嘅機場三跑長跑賽事，難得可以喺機場跑道跑步，跑友梗係到齊。星級跑手除咗有發哥周潤發、唐詩詠之外，「家姐」關心妍都係其中之一。

關心妍跑完比賽出post分享，話「人生第一次參加馬拉松機場渣馬3號跑道的10公里跑，這次是跑5公里！實在太特別了！可以看到飛機起降，我終於以39分鐘完成了5公里！ 沿途見到好多朋友同歌迷好開心」，仲post埋跑步過程片段。

不過Jade呢個post同佢當年將「關菊英」聽錯關心妍單嘢一樣，旋即引起討論，有人認為「家姐」又出事，因為佢跑嘅係5公里賽，唔係馬拉松；另外佢又將賽事寫成「機場渣馬」……明明渣馬係年頭先舉行。

近年熱愛長跑嘅ERROR成員保錡就出post寫道「Respect所有開始跑步的人，馬拉松代表42.195k ，5k就係5k，10k就係10k，大家都加油。」，似乎係澄清概念，但就俾網民話佢明串關心妍。而曾經喺TVB做過多年體育記者嘅伍家謙，就發長文回憶當年喺新聞部報導馬拉松賽事時，寫稿用錯字俾老細鬧嘅經歷，除咗講解點解要用字準確，更勸大家無謂「喺網上玩泥漿摔角」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！