詹天文內地升學呻冇聖誕節假期再被質疑 大方回應：自己開心就可以

現年18歲嘅「聲夢小花」詹天文（Windy），較早前透露獲美國伯克利音樂學院取錄，同時獲本港大學取錄，但最後放棄美國及香港嘅學位，選擇到廣州星海音樂學院升學。日前佢喺出席《新城勁爆頒獎禮2024》發布會，期間表示學校冇得放聖誕假期，及重提捨棄伯克利原因。

詹天文喺2021年參加《聲夢傳奇》時僅15歲，5歲已接受聲樂訓練嘅佢雖然早於第9集失準出局，但比賽結束後仍有幸被安排與炎明熹（Gigi）、姚焯菲（Chantel）和鍾柔美（Yumi）組成女團After Class，四小花亦推出SOLO歌曲。目前Windy喺廣州升學，佢表示自己已經適應香港及廣州兩邊走嘅模式，因為除咗搭高鐵好方便之外，學校附近美食眾多及學習氛圍好好。

詹天文早前參加校內嘅「第8屆英語文化節英文歌曲介紹與演唱大賽」 ，佢表示自己獲得雙料冠軍係意料之外，因為同學嘅實力好強，令佢覺得自己仲有好多地方可以提升。另外，詹天文表示好鍾意聖誕節，內地並冇聖誕節假期，但佢又想相約Chantel一齊慶祝，所以佢打算喺返香港工作時好好慶祝及感受聖誕節嘅氣氛。

詹天文嘅發言引起網民熱烈討論，因為佢放棄美國知名學院學位，反而選擇前往廣州升學，留言話：「條路自己揀」、「真係唔明點解有最世界最好嘅伯克利音樂學院唔讀，要走去廣州讀書」、「有美國唔去去廣州」及「自己揀去大陸又呻冇聖誕，係咪想鬧國家政策先？」等等。

至於詹天文點解選擇廣州升學? 佢早前亦有出IG Story解釋：「我知道去Berklee應該是對我學習背景來說的最佳選擇，因為它幾乎是全球最top的流行樂和爵士樂的學習基地，在那裡能學習到更多元化的音樂技能。但是...一方面可能我的胃還沒準備好，還未能接受到日日西餐的生活（這不是最重點哈哈哈）。另一方面，我覺得自己的狀態並未完全準備好去迎接一個全新且陌生的環境，也不想完全放棄目前學生歌手的身份。而我相信邊學習、並實踐，應該是走音樂這條路最好的狀態。」所以佢經過一輪深思熟慮後，最終選擇到廣州星海音樂學院升學。不過就唔少網民應該佢選擇錯誤，而佢就回應：「無法做出所有人都滿意的選擇，自己開心就可以。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！