獎門人｜林秀怡「傳紫菜」飛撲狂啜男嘉賓 周家蔚發言阻止洪天明被咀

TVB綜藝節目《獎門人台慶感謝祭》前日（16日）播出一集，邀請到「黑色月光隊」楊茜堯（原名楊怡）、王浩信、林夏薇、何廣沛、馬貫東、楊卓娜、葉蒨文及黃建東和「獎門人鐵腳隊」苗僑偉、湯盈盈、梁靖琪、姚樂怡、周家蔚及洪天明作嘉賓，陣容鼎盛。獎老之一嘅林秀怡於「開心無敵傳紫菜」環節對男嘉賓非常猴擒，其飛撲狂啜嘅行為惹網民熱議。

於「開心無敵傳紫菜」環節中，掌門人曾志偉首先安排錢嘉樂與一班美女嘉賓傳紫菜，錢嘉樂老婆湯盈盈隨即抗議，傳完一棒又馬上跑到下一棒，完全唔畀老公與其他人傳紫菜嘅機會。及後，曾志偉派出林秀怡與男嘉賓傳紫菜，林秀怡開心到衝上前抱住曾志偉大叫：「獎門人你好nice啊！」曾志偉提醒：「記住，係啜紫菜，唔伸脷㗎！」

林秀怡先與被選中嘅現場觀眾傳紫菜，之後再與男嘉賓傳紫菜，遊戲拍擋包括苗僑偉、何廣沛、馬貫東、王浩信、洪天明，林秀怡於遊戲中不斷將紫菜撕細，似乎誓要咀到一眾男嘉賓。林秀怡先對苗僑偉飛擒大咬，之後又飛撲去何廣沛身上，馬貫東和王浩信則表現抗拒，但最終難逃魔掌，馬貫東索性公主抱抱起林秀怡，王浩信則被黃建東輕力一推就與林秀怡親上。去到最後一棒嘅洪天明，則只剩一個角落嘅紫菜，洪天明投訴紫菜太細根本傳唔到，但林秀怡無理會仍喪啜；喺呢個時候，周家蔚就出嚟阻止，大叫：「手下留情」。

曾志偉又為林秀怡加碼，邀請現場男觀眾上台與林秀怡大玩傅紫菜，林秀怡仍然相當肉緊，雙手放喺男觀眾塊面上，令場面一度尷尬。有網民對於林秀怡呢次玩遊戲嘅表現反感：「低級趣味！」、「呢part過曬火，勁核突」、「睇都唔想睇」等等，不過都有網民覺得林秀怡夠晒大膽：「笑到癲，秀怡真夠薑」、「This part 笑死我」、「擺明捧林秀儀（怡）上位，不過佢都幾好睇幾自然。今次真係好博」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！