巾幗梟雄之懸崖｜程浩駿曾萌生退出念頭 收入低唔介意兼職送外賣

於TVB 熱播劇集《巾幗梟雄之懸崖》飾演「曹大虎」嘅程浩駿（Hellston）演出大獲好評，由初出場嘅惡霸形象，到之後被寧俐（陳楨怡飾）借嚟過橋，演繹出「愛與痛的邊緣」嘅掙扎，令觀眾對佢深感同情並封為「最慘情惡霸兵」。程浩駿於2017年加入TVB，多年來共飾演過至少30次惡人，喺拍攝《巾幗梟雄之懸崖》前更曾萌生退出娛樂圈念頭。

程浩駿入行多年，多數被安排於劇集中扮演黑社會或小混混嘅角色，即使加入《開心無敵獎門人》做「獎老」，但坦言工作機會無因而大增，只係多咗好多人嗌佢「班長」。程浩駿今次憑《巾幗梟雄之懸崖》「曹大虎」獲得關注，佢就表示能夠被觀眾留意係好大嘅快樂，直言「曹大虎」算係幾悲情嘅人物；又感謝《巾幗梟雄之懸崖》監製方駿釗，指對方留意到佢就算係手下甲、乙、丙好心機做，又畀佢喺《降魔的》、《愛上我的衰神》做未做過嘅角色。網民留言表示程浩駿喺《巾幗梟雄之懸崖》做得好好：「呢個曹大虎都算捱出頭來啦，希望將來更多機會係電視見到佢啦」、「做得好好啊」、「大虎哥好慘啊」、「原來係獎門人個班長，唔怪得咁熟面口」等等，有網民就指睇到程浩駿個樣估唔到佢係90後，惹程浩駿親自回覆：「經歷太多了。」

其實喺未拍《巾幗梟雄之懸崖》前，程浩駿處於入不敷支及迷惘期，喺睇唔到將來嘅情況下諗過離開娛樂圈，安安定定出去搵份工就算。不過，因為熱愛演戲及監製一個電話，決定拍埋先走，但喺拍攝嗰個半月期間重燃團火，直言唔辛苦都辛苦咗咁多年，不如繼續落去，又因「曹大虎」令佢知道自己仲有好多嘢未達到及未追求到，因此如無意外都唔會轉行；亦希望工作可以更上一層樓，咩角色都唔會推。

另外，程浩駿家人體諒佢收入唔多，亦無畀太大壓力佢；不過佢自己就採取積穀防饑嘅態度，炒散以外，與朋友合資開設製作公司，又推出協助老師們準備北上交流嘅網上行程，認為萬一演藝事業有咩三長兩短，都可以支持生計。程浩駿又唔介意邊做演員邊送外賣或搬屋，指自己無包袱，認為送外賣都係等人開門後遞畀個客，無人認得；又直言唔係偷呃拐騙，只係努力搵錢開飯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！