姜濤罕有開直播談姜糖神徒衝突事件 「我同Anson Lo有為呢啲事情唔開心」

MIRROR日前完成北美巡迴演出回港，成員Anson Lo盧瀚霆及姜濤歌迷喺機場等候時因為霸位問題而發生衝突，有神徒（Anson Lo fans）聲稱被人推跌受傷，現場有人報警求助。事發後Anson Lo接受訪問時話「如果大家為咗支持我而受傷，我覺得好唔值得」，表明當然唔想類似「機場事件」再發生，佢重申安全最緊要，但係各方面仲搵緊方法去解決。

另一當事人姜濤喺MIRROR電影《12怪盜》謝票場後就fans衝突回應，表示「我淨係希望大家可以安全快樂去支持我哋，唔好有任何爭執或者碰撞，呢個係我哋最唔想見到。我同Anson Lo 都有傾過，我哋都覺得好苦惱，唔知點樣做」，「希望以後每次見面，都可以係愉快、平安、安心地去進行」。

近期少有開直播嘅姜濤，尋晚喺IG再就姜糖神徒衝突事件開live表達睇法。平時唔算多言嘅姜濤直言開live緊張過上台。姜濤同前日AL嘅講法一樣，事發時佢地喺飛機得知fans推撞，佢同AL商量過點做，但結果都係唔知可以點，姜濤亦承認問題好難去解決。「我同阿Lo諗緊，係咪仲有啲地方做得唔夠好。我哋係咪可以再做多一步，就可以避免呢啲事情發生。我自己一直諗緊呢啲問題，我係咪應該同大家講sorry，係咪因為我自己做得唔夠好，所以先至導致呢個事情發生？我唔知，唔知道可以點樣做，所以，我如果有做得唔好嘅地方，我想同大家講聲抱歉，可能有更加好嘅方式去處理，但so far到而家，我未有任何頭緒可以做啲乜嘢。」

MIRROR成軍5年多，姜濤喺直播提到，佢發現fans之間衝突日益嚴重，唔止姜濤同AL唔知可以點，其他成員都唔知點做。姜濤話一直呼籲大家小心同安全為重，但情況未有改善，令佢覺得心痛。

兩幫fans衝突，偶像當然唔想見到。姜濤話佢同Anson Lo都有為此而唔開心，更承認「姜son」有被呢啲嘢影響到。「我哋係有互相唔理解過嘅，但後尾都知道，大家緊張我哋，先至會有呢啲事情發生，所以後尾好彩地，我哋而家真係好好嘅朋友。因為我哋係好好嘅朋友，所以更加覺得難過（指fans衝突），唔知點做。」

除咗唔知點解決fans間紛爭，姜濤直播中講得最多係問自己係咪做得未夠好，佢話希望成為大家嘅榜樣，但到而家都仲未做到。下周踏入25歲嘅「姜Admin」直播時透露今年生日願望，「希望呢個世界所有人，都可以有一個將心比己嘅心態，就夠㗎啦」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！