蕭徽勇揸的士做好事被網友盛讚 Gordon哥哥親自留言道謝

曾主持TVB兒童節目《放學ICU》嘅「Gordon哥哥」蕭徽勇，為生計於4年前開始揸的士，今年初更離開TVB。唔少睇住Gordon哥哥做節目嘅小觀眾已經長大，早前就有網民喺港鐵偷影到睇緊電話嘅蕭徽勇，將相放上社交平台並寫道「遇到TVB兒童節目主持，兒時回憶」。

其他網民就分享對Gordon哥哥嘅印象，當中有位被蕭徽勇接載過嘅女乘客就提到早前嘅經歷。「有次call的士返屋企，咁啱係佢接咗我個單，其實我同frd望到司機證嗰陣已經認得佢，因為我係搭的士去趕尾班n車，點知落車之後個巴士司機喺我面前開走咗架車！佢見到之後即刻話：阿妹上車！我幫你追返架車！我最後叫佢直接車我返屋企，落車俾錢，本身車費係$120，我俾咗$120 cash佢，點知佢俾返張$20我話：$100夠啦，唔使啦。做藝人真係好唔容易，見佢繼續有喺呢行努力，同時出嚟揸的士維持生計，覺得好感動之餘好respect佢，每個artist都值得被看見。」

呢個post被廣傳之後，蕭徽勇親自留言感謝女乘客，並且發文寫道「一個善意嘅偷影，換嚟一個窩心嘅故事，及好多香港人嘅支持及鼓勵！好感動」。蕭徽勇之後接受訪問時提到揸的士時被唔少乘客認出，當中唔少係廿幾三十歲嘅。蕭徽勇自言做兒童節目主持時，冇感受到好大迴響，以為當時小朋友唔睇電視台兒童節目，而家成日被人認出，令佢估唔到主持兒童節目可以帶俾唔少人美好嘅童年回憶。

46歲嘅蕭徽勇2001年入讀TVB藝訓班，後來加入兒童節目《放學ICU》做主持，並參演不同劇集。後來蕭徽勇喺2015年嘅劇集《實習天使》飾演智障人士而受注目，近年嘅《十八年後的終極告白》演「鬼仔強」同樣令觀眾留下深刻印象。蕭徽勇2008年起加入TVB配音組，曾聲演多套日本動畫。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！