黃淑蔓又組團又solo壓力山大曾迷失 陳健安分享靠創作尋找自我走出困局

早前安仔與「寰亞孻女」黃淑蔓（Feanna）為音樂平台「谷LIVE」Studio Live演出，Feanna演唱《I am All Alone》、《已刪除的時間線》和《我的受保護動物》，以及安仔演唱《戀愛腦之死》、《唔明你講乜》和翻唱Kiri T的《至少做一件離譜的事》，他們還將《如果青春不會有盡頭》與《仍然是那個少年》重新編曲，讓兩首歌互相呼應，令人耳目一新。

雖然Feanna年紀輕輕，但出道早，加入寰亞音樂接近十周年，所以同公司大部份歌手都稱她「師姐」，不過在安仔面前就是小師妹，因為他以C AllStar成員身份加入公司超過十三年，Feanna笑嗌「師兄」。提到二人各有新歌派台，Feanna說：「我首《我的受保護動物》係講一啲發生喺超級熱戀期少女嘅事情，我形容係你首歌《戀愛腦之死》嘅前傳。」安仔讚歎Feanna的心思。

「而我首《戀愛腦之死》係講一個人被戀愛腦搞到無咗自我，然後慢慢醒覺，唔畀自己再係咁落去。」安仔認為Feanna很理智，甚至會主動拯救戀愛腦朋友。Feanna自爆是超級戀愛腦，即使身邊人力勸都無用，她還引用安仔《仍然是那個少年》歌詞 「不准聽勸告 仍然有青春的道路 任性得叫前人看到 會警告」。

Feanna短短四個月派三首新歌，連她自己都不敢相信，說：「推出Me&團歌之後，我著手籌備solo歌。《I am All Alone》之後，咁啱電視劇播放，推出電視劇歌曲《已刪除的時間線》，因為錄歌時未知播劇日期，個劇播嘅時候咁啱我要派solo新歌喎，所以好驚喜咁四個月派三首歌。其實我好開心，密集嘅感覺令我重拾工作嘅步伐。」她坦言前陣子感到迷失，現在很開心和感恩。

安仔提議Feanna 聽他的歌《未知道》，說：「呢首歌係我由C AllStar轉為單飛發展推出，我組團超過十年，轉單飛初期好迷失，又失聲。為咗搵返自己，我收埋自己，唔搵幾個兄弟和監製，又斷食又冥想，好想清空自己歸零。當時好大壓力，結果透過創作，寫歌去睇返自己係乜嘢！其實你依家又可以女團又可以solo ，係好事，雖然都會大壓力。」Feanna獲益良多，表示會細味歌詞，說：「多謝師兄！」