《全民造星4》60強 阿妹、Yanny、Jackie出局 方方Ling入圍 網民鬧爆︰組婦團?

經過3個禮拜嘅播放，《全民造星4》第一輪比賽終於完成。尋晚(星期五)播放嘅一集，2位導師許廷鏗同梁祖堯喺48位未能出線嘅參加者當中，揀出12個復活人選。

結果被網民愛戴嘅阿妹、Yanny、Yanis、人氣網紅Jackie(劉展翹)、ERROR成員193細妹郭嘉盈都未能入圍直接出局,反而表現唔夠搶眼嘅Ling、曾經參加《造星3》嘅方方等居然入圍，網民爭相喺ViuTV Facebook帖文下面瘋狂留言鬧爆，節目播出後5個鐘已經有1300則留言。

佢地不滿嘅理由可以歸納為呢幾類-

1. 入圍者年紀偏大，同組成女團嘅目標有出入。被稱為「新花姐」嘅女團經理人Wing曾經講過年齡都係揀人因素，但係有唔少後生女根本入唔到60強。

2. 導師偏幫熟人。方方舊年參加過《造星》、媽媽級嘅Ling個仔演出過梁祖堯嘅音樂劇，趙展彤同許廷鏗一齊參加過《超級巨聲》，都令網民高呼唔公平。

3. 60強唔係最好嘅60個。初賽期間都有網民質疑評審標準，例如中性打扮嘅Dru、淘汰Jackie嘅Sica等都爆冷出線。

有人歡喜有人愁，另一批網民心水如女醫生咖喱、Gao、Ashi、Yoyo都成功復活，起碼保留節目一定觀看性。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！