「立會男團」踩台 梁熙事前特訓學台風練唱腔

議員管浩鳴、李鎮強、陸瀚民同梁熙等「立法會男團」成員，尋晚(10日)應邀為一個地區音樂會擔任表演嘉賓。事後梁熙喺社交平台貼文，話早前已做足準備，​向歌唱老師進行特訓，而佢上台獻唱嘅歌曲，就係廿幾年嘅舊歌《強》。之但係，睇返舊年11月，梁熙同李鎮強喺小西灣嘅「孖頭」議辦開張當日，現場就有人高唱《強》呢首歌，而呢首節奏明快嘅舊歌，莫就非係梁熙嘅「飲歌」？

儘管每個人都總有一、兩首「飲歌」，但梁熙強調並唔係《強》。佢話作為「飲歌」嘅條件，首先係要熟悉嘅歌曲，然而喺佢成長嘅年代，流行曲內容主要係情情塌塌，佢擔心同尋晚音樂會嘅氣氛格格不入，於是就選擇歌詞充滿正能量嘅《強》。佢又話尋晚嘅舞台因有字幕裝置，獻唱之前無需強記歌詞；不過，下周二佢要出席另一個地區音樂會，而屆時嘅場地就唔會有字幕提示，所以佢都想快啲搵返首內容積極、歌詞易記嘅「飲歌」。

至於佢提到向歌唱老師進行特訓，係事緣於早前佢落區，喺小西灣社區會堂遇到歌唱老師指導成人歌唱技巧，於是佢都趁機學埋一份。雖然時間唔係好長，但總算涉獵到唱歌如何運氣、拉高聲調、掌握音準同台風嘅技巧，受用無窮咁話。