【日本拜師學習職人精神】拉麵女師傅油麻地開店 期間限定芫荽拉麵

召喚芫荽黨黨員！呢間日式拉麵店新出期間限定嘅芫荽濃雞湯拉麵，用足芫荽榨汁、煉油同磨粉，可想而知湯底有幾濃郁。其他口味拉麵亦出色，皆因主理嘅師傅經驗豐富，更曾到日本學師，從因為係女仔而被睇唔起，到學成返香港開店，就係靠住一份職人精神同毅力。

Maki拉麵位於油麻地鴉打街，店面模仿日本屋台設計。餐廳負責人兼主廚Maki入行已有15年，先後任職於多間拉麵店。更喺日本學師四年，期間去勻日本各地試唔同地區嘅特色拉麵。Maki回想當時因為自己係女仔、身形嬌小，走入廚房學習嘅時候曾經被睇唔起：「佢哋會問你有無咁嘅體力？有無咁嘅毅力？你係咪真係想學？」加上以外地人身份去拜師，特別係家庭式小店會怕Maki學師後會自己開店打對台。

面對重重困難，Maki指當中最大得著就係學到「毅力」，例如趕喺師傅開工之前返到舖頭，爭取最多時間去學習、練習，達到全神貫注唔可以分神。因此Maki形容拉麵師傅係講究毅力、體力、精神，甚至心情去配合，要做到人神合一。

小店嘅拉麵湯底主要有兩款，一款係Maki到日本拜師學藝嘅時候主攻嘅九州風格豚骨湯，用70磅豬筒骨、豬脊骨、免治雞肉、豬手熬煮12小時成奶白色，濃度達10至11度（以濃度計測量）。另一款係Maki喺日本四國食完而自己研發嘅雞骨湯，以20公斤雞腳、雞殼、雞頸熬六小時，濃度亦達五度。湯底熬煮需時，因此拉麵都係限量供應。

想幫受疫情影響嘅各位香港人打氣，小店嘅拉麵都以顏色命名，最新嘅期間限定就係綠色嘅芫荽濃雞湯拉麵（預計供應至12月底）！湯底以自家雞骨湯加上新鮮芫荽汁、芫荽油同芫荽粉，再放上新鮮芫荽，單係芫荽粉每八至九碗拉麵就要用到一斤芫荽去做。湯底味道平衡，食得出芫荽嘅清香，同時唔會有任何草青味，仲保留到雞湯嘅清香。

配料由叉燒改為慢煮雞髀肉同蟹肉，慢煮雞髀肉彈牙嫩滑，特別係雞皮爽彈又富雞油香，一絲絲嘅蟹肉亦相當鮮甜。特別在Maki將溏心蛋用竹炭粉、味啉、醬油等腌成深紫色，原來係模仿緊芫荽皮蛋湯當中嘅皮蛋，流心蛋黃非常香濃，蛋白又夠入味。麵底為以粗曲麵，麵質爽彈、軟硬適中又掛湯。

以櫻花蝦、特調辣椒油配搭豚骨湯，櫻花蝦嘅香、辣椒嘅刺激，同豚骨嘅香醇濃厚融為一體，味道豐富，而且兩款湯底都係香濃得嚟完全唔油膩！麵底亦特別改為幼身嘅日式白直麵，無咁掛湯食落就唔會覺得膩。

中間形似皇冠嘅係即炸櫻花蝦天婦羅，麵衣輕薄口感酥脆，建議將一部分天婦羅浸湯再食，櫻花蝦香氣立刻加倍！叉燒肥瘦均勻，以火炙逼出油分，口感軟嫩帶脂香。加上爽口嘅黑木耳，同香脆嘅原片Yaki Nori金裝紫菜，非常滿足。

小店另一主打係串燒，當中熱賣No.1就係厚燒牛舌。不惜工本選用牛舌芯，爽脆彈牙、肉厚多汁。簡單加鹽同黑椒炙燒，已經可以帶出濃郁牛香。

坊間嘅雞軟骨通常都係一粒粒，呢度嘅雞軟骨就特別揀用雞胸骨中間嘅三角骨，一隻雞得一塊㗎咋！大大塊更好咬更爽脆，中間仲有雞肉，夠過癮。微甜嫩滑嘅玉子燒就加咗香蔥，增添香氣之餘味道更清新。

魔鬼燒魚翅乾係開飯仔私心推介嘅燒物，將魔鬼魚魚鰭燒至微焦，一上枱就聞到好香嘅魚乾味，食落邊緣香脆裡面煙韌有咬口，甜甜哋唔會太薄或者太乾，點埋七味粉同蛋黃醬更加係會食唔停口呀。而蒲燒鰻魚厚身、肉質軟滑，入口有豐富嘅醬油香同焦香。

日式拉麵店唔少得餃子，餃子皮煎至金黃香脆，裡面嘅餡料加咗細細粒嘅雞軟骨，口感層次豐富。

Maki拉麵
地址：油麻地鴉打街48號雅寶大廈地下8號舖

文：Cathy.H
相、片：Wilfred Chui