【是非磁石】 周啟生試過被指虐兒 鬧勻陳奕迅譚詠麟張學友

是非磁石 周啟生試過被指虐兒 鬧勻陳奕迅譚詠麟張學友

80年代曾經走紅嘅音樂人周啟生,尋日去警署報案,就佢同第二任妻子所生嘅21歲仔周爵懷疑被毆打而報警。周啟生曾經提過周爵有過度活躍同學習障礙,正入住宿舍,近日因為行動不便而發現腳趾尾有骨裂,而且暴瘦十幾二十磅。

60歲嘅周啟生最為人記得嘅,唔止係年紀輕輕就同多位天王巨星合作,仲有佢歷年來嘅是非。

獨留兒子在家 被控疏忽照顧兒童

周啟生喺兒子周爵懷疑被毆打後見記者,提到事件涉及「虐兒」,但諷刺嘅係周就曾經被控疏忽照顧兒童。周啟生2013年去外地公幹期間,將周爵獨留家中,只係派鐘點上門照顧起居飲食,後來周爵深夜㩒鄰居門鐘驚動警察令事件曝光。周啟生後來被控疏忽照顧兒童,佢承認控罪,被判80小時社會服務令。

大數陳奕迅五宗罪

向來敢言嘅周啟生,喺上面講到嘅獨留阿仔在家事件後,接受訪問時又焫起火頭,先將香港樂壇比喻為「末期癌症阿叔」,又力數陳奕迅五宗罪,包括歌曲《碌卡》難聽、聲線唔夠張學友好、唱片唔賣得等。不過後來佢又轉軚話有讚Eason,係傳媒斷章取義。

是非磁石 周啟生試過被指虐兒 鬧勻陳奕迅譚詠麟張學友
是非磁石 周啟生試過被指虐兒 鬧勻陳奕迅譚詠麟張學友

鬧譚校長冇盡社會責任

周啟生自稱係譚詠麟《愛的根源》原創人,舊年有片段流出見到譚校長同埋一班明星足球隊成員,出席時任警務處長鄧炳強嘅飯局。周啟生喺一個訪問度暗示譚「幾時有過社會責任?」,又話「唔值得再擺呢啲人喺心」。

籌款show同行唔撐 暗寸張學友Eason

舊年疫情之下演出業進入冰河時期,周啟生搞咗個網上音樂會,為職業樂手籌款支持生計。周啟生透露籌備過程中樂壇中人反應冷淡,仲話有歌手寧願參加由Lady Gaga牽頭嘅籌款show,都唔撐幫歌手伴奏嘅樂手。周啟生所講嘅網上演唱會,香港代表有張學友同陳奕迅,鬧緊邊個?好明顯啦。

同姪仔周永恆反面

姪仔周永恆(Roy)2001年出道,係由周啟生帶入行並擔任經理人,不過冇耐就因為錢銀問題而反面。後來周永恆被指襲擊前妻趙頌茹兼偷食,周啟生「手下留情」不欲多提;但係2017年Roy又有負面新聞,記者搵周啟生講兩句,佢就稱姪仔做「嗰位仁兄」,仲話冇聯絡好耐,擺明割席!

是非磁石 周啟生試過被指虐兒 鬧勻陳奕迅譚詠麟張學友
是非磁石 周啟生試過被指虐兒 鬧勻陳奕迅譚詠麟張學友

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!