【曾戀衛詩雅】洪卓立爆肺後嚐盡人情冷暖 湯怡一拍戲就擔正
31歲嘅洪卓立,06年參加「英皇新秀歌唱大賽」得到亞軍入行。佢憑住青靚白淨外型以及不俗嘅唱功大受歡迎,07年一出道就拎晒四個樂壇頒獎禮嘅最佳新人成為炙手可熱嘅「新人王」,08年憑《彌敦道》一曲榮登電台及電視台榜首,名氣大增。
可惜,09年因爆肺兼肺積水被逼停工休養接近兩年,本來扶搖直上嘅佢更曾被誤傳死訊,結果成日被網民笑佢已經唔在生,連首《彌敦道》都被網民改成《陰陽路》,觀眾對佢歌唱嘅印象亦一直停步,不過戀情方面,其實早期嘅佢一樣多彩多姿。
08年立立同衛詩雅拍戲傳出戲假情真,更被爆狠飛圈外女友,不過兩人最終都喺半年後玩完。有報道指正正喺立立失戀嘅呢個時候,同門師妹湯怡時時都會關心佢,久而久之兩人就成為蜜友。
據知兩人為咗唔俾英皇知道拍拖初期一直低調,即使緋聞浮晒面兩人都一直否認,直到13年洪卓立先首度承認女友地位:「我哋確實拍咗拖若干年,其實之前有某啲對佢好唔公平嘅報道出街時我都想認(拍拖),但又覺得唔係好啱時間,我哋都有共識好耐,依家我哋關係都好穩定,而且年紀又唔細,所以就由我公開。」洪卓立亦喺一個訪問中講過,拍拖初期其實已經認定湯怡係結婚對象,但自從爆肺之後,立立就覺得既然已經一齊住,結唔結婚都冇分別,所以打消咗呢個念頭。
一句講晒,立立一直都係湯怡處處著想。
男方因為爆肺被消失兩年,由「新人王」變咗做「鬼魂」,事業一直冇乜突破,上年年初搬屋時,仲被湯怡唔小心掉晒全部新人獎。而女方嘅事業就啱啱相反,湯怡06年因為參加《美女廚房》而成為藝員,外型一啲都唔差嘅湯怡,雖然一直都喺唔少電影電視作品中出現,但係咁耐以嚟都係配角,直到13年香港電視呢個機會,湯怡嘅演出開始被賞識,今年更首次擔正做電影《某日某月》女主角。