【有一種努力叫靠自己】王浩信餅印細佬王瑋彤唔靠關係 靠自己努力爭取機會

香港娛樂圈中有唔少高顏值嘅親生兄弟姊妹，雖然佢哋好多時唔係一齊工作，甚至星途懸殊，但都冇影響佢哋嘅關係，仲默默為自己嘅工作而努力。

歌手出身嘅王浩信，除咗合唱歌《拖字訣》之外，佢就冇咩代表作。後嚟佢轉戰電視，憑《名媛望族》中被劉松仁怒摑13巴及《法外風雲》被謝雪心摑23巴，被稱為「兜巴信」後而人氣急升。2015年開始，王浩信開始被無綫力捧上位，參演嘅劇集及戲份越嚟越多，當中《EU超時任務》嘅渠頭、《不懂撒嬌的女人》嘅Saving及《踩過界》嘅盲俠，演技都獲得觀眾及網民認同，2017年憑《踩過界》榮升視帝，成為無綫當紅一線小生！

而今年29歲嘅王瑋彤（Tony），無論身高定外貌都同王浩信超級相似。冇錯！呢位6尺2寸高嘅靚仔就係王浩信嘅親細佬，喺美國讀完商科畢業返香港後，因為唔鐘意返朝9晚5工作嘅關係，加上眼見阿哥喺無綫發展得唔錯，所以同屋企人商量後，佢就決定跟阿哥入娛樂圈試一試。

有樣、有身材又有學歷嘅佢，其實曾經去過面試藝員訓練班，不過去到second-in就被淘汰。不過以佢嘅條件又點會冇人要呢？佢之後被Model公司簽約做男模特兒，以model身份入行。喺2016年，佢就參加香港先生，原本被睇高一線，不過佢後來因健康問題而被逼退選。另外，佢仲參加過內地相睇真人騷節目《非常完美》。

雖然有個做男一嘅阿哥，不過Tony冇諗住靠阿哥，一邊拍劇一邊做保險。佢選擇憑自己嘅努力去爭取演出機會，好似喺《飛虎之潛行極戰》中飾演O記警員灰熊。得到阿哥同屋企人支持嘅佢，雖然暫時都係做配角或者係客串嘅角色，相信假以時日，佢都可以做到好似佢阿哥咁好成績。