【百萬Blogger】財務自由難在堅持 （財叔）

當財叔都有人幫佢出書，呢個世界真係無野不可能，所以真係不要太睇小自己，只要你有夢，就一定有機會夢想成真！

好多謝出版社用了不夠一個月，就將書完成，雖然我一直夢想我的第一次好完美，但好多時事實與夢想係有距離。後來總編輯同我講，如果要改，改一百次都還有得 改，我諗下又有道理，如果不停改，真係永無止境！所以最後我同出版社講，只要佢地以讀者角度睇完覺得可以便行，因為我出書並非為滿足自己，而係希望讀者得 益，否則要等三年又三年啦！

由於時間緊迫，本書連自序都趕唔切寫，如果有機會出第二版就補返啦！如果無，就返Money呢度睇啦！其實點 解會有財叔出現呢？話說自2002年起，當我領悟到「淨租金回報論」後，我便成日叫人買樓，但係個個都當我傻佬，以為我想搵人接貨，無諗過我真係想朋友富貴，唔係想朋友閉翳，所以依家好多人都同我講相逢恨晚，其實無晚㗎！

網友誇獎叫「財神」

識我的朋友這十幾年唔超過5個人信我，所以早識我都無用，後來2008年我報讀室內設計課程，認識了兩個同學SK和Andy，我當然又樓神上身，大談對投資睇法，點知兩個老兄又好認同我， 仲叫我出書！但係我講就天下無敵，寫就倒吊都無滴墨水啦！後來他們建議我不如寫Blog，寫下寫下咪夠一本書囉！就係咁，我開始寫大綱，之後一連寫了40 篇，但發覺無乜人睇，所以打算不再寫了。點知一篇《再見》一出，竟然瀏覽量大升，又有好多留言叫我繼續寫，就係咁開始左寫Blog！

至於點解我會叫財叔呢？我諗當年用「財務自由」做招牌的人應該無現在咁誇，我當年以「財務自由人」作筆名，後來被人叫「財哥」、「財爺」、「財神」等，所以叫大家俾面就叫聲我「財叔」啦！

估不到寫寫下，就寫了幾年，其實真係寫到無野好寫，因為我不是財演或分析員，我只係分享我過去十多年的經驗，所以寫來寫去都係「三幅被」，寫左幾年就無再寫啦！

切忌跳級讀「大學」

而且我發現追求財務自由的人其實不多，想發達的人多左，因為每每有人話賺大錢就會一窩蜂跟風，我好言相勸，最後還是枉作小人，不知有幾多人仲坐緊艇？要上岸的人回頭望返海裏面的人其實仲難，好似後來成立「財務自由同學會」，我要求一些早期的網友跟其他人分享，答下問題，但真的絕無僅有，大多回覆也是很忙、 沒時間，但回想之前晚晚問我問題時，卻又大把時間喎！

過左這麼多年，其實能踏出第一步的很多，但是能堅持的就很少了，大部分人也是跌入 Comfort zone後就停止前進，以為租金回報不錯便已停步。還有一些人不自量力，見人話投資住宅是幼稚園或小學，投資工廈是中學，投資舖位就是大學，又唔諗自己幼稚園都未畢業就走去讀大學，你睇今時今日幾多大學生失業？我早兩日行過天后，真係有成條「死街」出現！所以其實財務自由之路並不擁擠，因為堅持的人不 多！

本書出版之後，多了好多人問問題，但按我多年經驗，大部分都係「有事鍾無艷，無事夏迎春」；又有人問完問題，你答左就消失，連收到都無交代句；又有些根本只是路過，根本不知我寫過乜！還有人層次已經高過我，好似有人問：「點可以達到比財務自由更高境界？」其實我都未達到，又點教你呢？所 以我已不會私下回覆，祈為見諒！

作者：財叔

擁有20多年投資物業經驗，見證樓市高低起跌，1997年金融風暴、2003年沙 氏谷底、2008年金融海嘯，均成功管理風險安然度過，要訣是識得計數。昔日廢青，會考兩科合格，目標明確，如今未足50歲達致財務自由，辭工追夢，助人 助學，希望可啟發更多財務自由人，找到心靈富足。本欄所得稿費，全數捐贈慈恩基金會作慈善用途。（本作者文章隔周刊出）