《愛·回家之開心速遞》已變質？網民出PO力數四宗罪

TVB處境劇《愛·回家之開心速遞》自2017年播出至今已超過2300集，劇集一星期播足7日，食飯時間打開電視都會見到佢哋，令唔少演員成功憑劇中角色入屋，人氣急升。不過近日有網民喺討論區以「依家套愛回家仲應唔應該叫愛回家？」為題出PO，力數4大原因令劇集已變質，得到唔少網民認同。

1. 多位核心演員先後離巢
《愛·回家之開心速遞》播出超過7年，不時有演員離開劇組，甚至離開TVB向外闖，當中不乏核心角色，例如「紅衫魚」熊心如、「細龍生」鄭世豪、「細龍太」陳思圻、「無知May」趙希洛、「博士」馬貫東及「Mandy」謝芷倫等等，唔少網民都表示認同，留言「太多人退出喇 索性開過另外一套吧啦」、「淨低啲角色完全無特色 得番大小姐 但都已經做到好悶」、「幾多熊家龍家既人走晒」、「無咗細龍太嗰下已經唔好睇」、「太多人退出喇索性開過另外一套吧啦」、「愛回家但成家永遠都唔會齊人，個個都quit倒不如喺最高峰時完咗佢，唔通等成家散哂個陣先完咩」及「啲人走晒之後劇情亂嚟係真 加楊明 又寫bonnie同蔥頭一齊 蔥頭個角色根本廢既」等等。

2. 硬捧不被網民討好演員
《愛·回家之開心速遞》不時有新臉孔加入，除咗為觀眾帶嚟新鮮感之外，同時亦可以給予新人機會，不過近期加入嘅演員都似乎唔太受網民喜愛，尤其係被點名嘅楊明、古佩玲及何晉樂。網民表示「自從集集都見到個膠面攝石人就冇睇，三姨同細龍生都走埋仲邊到係愛回家」、「好耐無睇 有個女人坐沙發位，又無咩對白又扮熊家人咁」、「楊明真係趕客 搵個劣質藝人拍戲 係內地依d罪犯一早比人封殺晒」、「硬捧唔討好嘅後台演員，漠視觀眾喜好同感受，真係好趕客，亦將僅餘觀眾嘅熱情都耗盡」、「仲格硬加隻楊明落去完全唔match 每次見到有佢就打機算」、「有楊明已經錯X哂 講安仔同bonie 凌凌個期好笑」及「雖然劇情就唔駛有太大要求 但新個堆楊明 膠面人 弱智joe 根本趕客」等等。

3. 劇情無聊又胡鬧
有網民認為以前嘅劇情比而家精彩及有趣味，唔少主副線，例如「天才聯盟補習社」及「香港島大學」等都被消失，而家嘅劇情胡鬧同嚟嚟去去都係龍家爭家產，留言話「而家根本hea拍，劇情冇進展 (joe返嚟唔知會唔會好d) 不過套劇收視高，製作費低，少外景，編劇唔使點用腦求求其其又一集，做到2046都唔出奇」、「頭兩年好睇喎 劇情夠新鮮突破 唔似一般處境劇 相比起其他劇佢啲劇情深刻好多」、「D笑位無聊到呢，一個月都唔知有冇睇一集」、「以家集集都玩胡鬧 無哂以前初初愛回家個D單元故事」、「以前愛回家貼地好多，講下島大，講下補習社 而家d人走晒，得番d 無聊既劇情」及「龍家依條線好X悶 集集內容都差唔多咁」等等。

4. 感受唔到愛
劇集名叫得《愛·回家之開心速遞》，但唔少網民都認為現時嘅劇集冇愛及溫暖，仲多咗人與人之間嘅爭鬥及針對，留言「無家的溫暖」、「仲有套嘢熊家班人做咗啲好似好溫馨嘅嘢，點知原來背後又係有原因/陰謀，呢下真係好恐怖，完全feel唔到愛，真係教壞細路」、「格硬拆散咗安仔同Bonnie已經冇再睇」及「成個屋企三日唔埋兩日又嘈交，同之前第一代套愛回家真係爭好遠」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！