反黑英雄丨袁偉豪被嘲老 鄭啟泰遺作一出場被擊斃 網民： 樹哥真人都走左

TVB警匪新劇《反黑英雄》喺噚晚（24日）首播，陳山聰、張振朗、袁偉豪、張頴康、朱晨麗、姚子羚、傅嘉莉、黃子恆、林景程及何沛珈等人主演，主要講述2019年嘅一單槍擊案，主打「港式暴力美學」喺橫街窄巷及鬧市中上演搏鬥情節，以及黑幫之間嘅惡鬥招數。劇集除咗由去年叫好叫座嘅《新聞女王》總監製鍾澍佳和《星空下的仁醫》監製方浤酌兩強聯手，更是姚子羚首度挑戰演繹江湖大嫂，非常有睇頭。唔講咁多，而家就同大家睇下首集網民反應啦！

陳山聰考DSE ？
陳山聰喺劇中飾演PTU警長關智軒，佢喺劇集開頭就聲稱自己一心想做幫辦，但可惜考DSE英文唔合格而要補考，唔少網民聽到後都表示困惑，因為首屆DSE係喺2012年，所以喺年齡上係絕對冇可能，並留言話「你幾碎呀dse」、「陳山聰幾十歲人考DSE？」、「陳山聰考DSE」、「乜料啊DSE? 你30歲都嫌作細咗十年啦」、「佢考DSE ？」及「呢個真係笑X死 啲編劇係咪以為廿幾歲後生仔做 點知畀咗陳山聰佢」等等。

鄭啟泰遺作
資深DJ及TVB藝人鄭啟泰喺今年2月3日離世，終年56歲。鄭啟泰喺生前參與過唔少劇集演出，而佢喺噚晚首播嘅《反黑英雄》亦有份演出。噚晚劇情講到西九龍警區機動部隊（PTU）警長樹哥（鄭啟泰飾）帶領下屬阿軒（陳山聰飾）、阿賢（張振朗飾）及阿燦（林景程飾）巡邏，期間遇上珠寶劫案並遭到冷血悍匪搶槍，導致樹哥當場被擊斃，而四人嘅命運自此被改寫。雖然鄭啟泰喺劇中戲份唔多，不過唔少網民睇完佢嘅演出都感到可惜，留言話「真。遺作」、「樹哥真人都走左」及「鄭啟泰滿是戲,可惜」等等。

袁偉豪被嘲老
袁偉豪喺劇中飾演冷血悍匪陳祖耀，佢一出場就與阿細（關曜儁飾）一齊打劫金舖，並喺逃跑期間錯手槍殺鄭啟泰。之後佢著草到泰國，但被對頭黑幫陷害而入獄5年，出獄後返香港報仇。有網民認為袁偉豪好啱做呢類型角色，並話「木口木面既冷血賊啱哂袁偉豪做」及「這次阿ben做壞人，妝髮順眼好多，一度回春甚至夢回那個巔峰的天堂哥。」等等；不過亦有網民認為唔合適並覺得佢老咗好多，留言話「袁偉豪近鏡老左好多」、「袁偉豪完全唔型 明明個角色幾正」及「袁偉豪做壞人真係搞唔掂」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！