【群星賀聖誕】周杰倫首晒囝囝正面相 心穎陪馬明宅在家睇波?
噚晚平安夜,眾星選擇簡簡單單咁過,話晒節目最重要係過得開心,同埋有親友喺身邊就足夠,今日望一望個Ig就會知開心其實好簡單。
胡定欣喺美國返嚟冇耐,噚日喺Ig貼咗一張聖誕樹相,指自己用咗幾個鐘頭做家務,之後坐低休息,欣賞家中嘅聖誕樹,感受寧靜嘅聖誕氣氛;而黃心穎就喺Ig晒出托腮自拍相,留言:「宅在家食零食睇球賽replay、係replay呀!!平安夜呀!Wishing u all a warm and cozy Christmas Eve呀!」上年馬國明同黃心穎喺平安夜拍拖sweet爆睇戲,估唔到做咗毒毒馬明嘅女友後,連習慣都變得深閨,未知呢張相係唔係由馬國明「操刀」,二人愛宅在家呢!?
汪阿姐就同老公羅家英約埋契女一家去食自助餐,汪阿姐喺Ig貼出合照,今次就冇再加「汪阿tag」,相中汪阿姐同羅家英齊齊戴上party hat,相當應節,而羅家英更喺派對上,唱出汪阿姐經典金曲《萬水千山總是情》,又唱又跳,估阿姐都應該冧晒喇!
早前蕭正楠喺頒獎禮上,公開宣佈已婚,稱黃翠如叫蕭太,今年係翠如BB第一次以蕭太身份過平安夜,佢哋兩公婆約咗C君同唐詩穎等開P。
周杰倫就首次喺Ig貼出囝囝Romeo嘅正面相,雖然周杰倫用黑超圖案遮咗囝囝對眼,仍然好明顯睇到Romeo嘅嘴超似爸爸,感覺都有啲似「周杰倫2.0」。
至於已有家室嘅藝人,好似張繼聰、姚瑩瑩、毛舜筠、胡杏兒都紛紛喺Ig貼出仔女相,祝大家聖誕快樂。