【金像獎預測】入行16年視后成影壇新人 胡定欣︰呢件事好有趣

香港電影界嘅盛事「第三十八屆香港電影金像獎」，將於4月舉行，而第一輪投票於噚日（22日）截止。雖然入圍名單，要下個月先公佈，但《蘋果》率先預測吓幾個主要嘅演員獎項，包括男女主角、男女配角及新演員嘅入圍大熱，究竟邊個會入圍成為候選人呢？

其中較矚目嘅莫過於入行16年嘅視后胡定欣，佢去年首次拍電影《逆流大叔》，好大機會有份角逐「最佳新演員」，以佢嘅演技可謂勝券在握，成為大熱人馬。對於自己成為「最佳新演員」入圍熱門人馬，胡定欣接受傳媒訪問時直言︰「呢件事好有趣。」

胡定欣表示2002年入行，一直集中拍劇，好少機會跟其他單位合作，佢話︰「我拍完《宮心計2深宮計》後，跟住就放假，當時鎮宇哥（吳鎮宇）搵我拍電影，我都冇問清楚個角色，因為我入行就同佢合作拍劇集《衝上雲霄》，佢一路都好支持我，我好相信佢，今次真係無心插柳。」已成為視后嘅胡定欣，好大機會入圍「最佳新演員」，佢笑言︰「我喺電視唔係新人，更加冇諗過會合資格成為電影新人，呢件事真係好有趣。」問到視后未來會否轉戰電影圈？定欣話︰「電影圈我係新人，仲有好多嘢要學，希望可以跟唔同嘅電影人合作。」此外，最有機會入圍新演員，其實仲有《起底組》嘅陳凱琳、《三夫》嘅陳湛文，同埋《淪落人》嘅Crisel Consunji。

男、女主角方面，率先喺「第二十五屆香港電影評論學會大獎」中，憑《淪落人》獲得「最佳男演員」嘅黃秋生，以及憑《三夫》獲得「最佳女演員」嘅曾美慧孜，兩人都被睇高一線，入圍金像獎應該冇難度。仲有邊個可以同佢哋爭入圍？好似入圍角逐「亞洲電影大獎」亞洲影帝嘅《無雙》郭富城，仲有《無雙》嘅周潤發，以及未攞過「金像獎」影帝嘅《棟篤特工》黃子華及《逆流大叔》吳鎮宇，分分鐘佢哋都有機會入圍。至於影后方面，除咗首次拍電影嘅胡定欣之外，同樣都係視后嘅《棟篤特工》佘詩曼，仲有趕得切12月底前上咗5場嘅《非分熟女》蔡卓妍，同埋不可小覷《非同凡響》嘅余香凝。

至於男、女配角方面，唔單止有影后級人馬嘅《翠絲》惠英紅，率先入圍角逐「亞洲電影大獎」嘅「最佳女配角」，仲有邊個有機會同佢爭入圍呢？好似《葉問外傳︰張天志》嘅周秀娜、《無雙》嘅周家怡都唔弱。先拔頭籌喺金馬獎攞咗「最佳男配角」嘅袁富華，同《逆流大叔》嘅潘燦良，以及《無雙》嘅廖啟智，都係好戲之人，齊齊有望入圍男配角。至於金像獎嘅正式入圍名單，將於2月12日正式公佈。