雅虎香港新聞 三年情玩完！姚子羚同鄭子邦分手，閨密出動安慰
37歲姚子羚Elaine同過億身家嘅鄭子邦拍拖三年，不時被影到一齊去旅行、行街，看似甜甜蜜蜜，最近仲成日傳出婚訊，Elaine亦搬入男友位於赤柱紅山半島嘅豪宅同居，點知最近就有傳佢哋二人分手收場。
恨嫁嘅Elaine一直都等緊男友求婚，而好姊妹杏兒之前就有暗示，話今年有「胡說八道會」姊妹好事近，個個都以為姚子羚終於嫁得出。
姚子羚一直都好恨結婚，好想生小朋友，但又怕開聲會迫走男朋友，所以之前喺《胡說八道真情假期》中，就同班好姊妹一齊做戲，由胡杏兒扮其男友鄭子邦求婚，姚子羚超冧，明顯係向男友暗示。
可惜嘅係男友鄭子邦一路都「拖子訣」，佢根本就唔想咁快結婚。身家過億兼擁有過百部的士嘅鄭子邦，好多女埋身，加上佢又未玩夠，所以唔急住結婚。
就係咁，早前Elaine就同男友攤牌，男友覺得Elaine成日逼婚，搞到佢好大壓力，又加上阿邦離過婚，更加唔想咁快結婚，怕拖累Elaine。但係Elaine就唔係咁諗，最後二人都達唔成共識，要分手。
Elaine失戀，一班好姊妹即刻出動安慰、陪伴，大家都叫Elaine唔好咁難過。
李施嬅更喺Ig貼出大合照，hashtag一句：「We support no matter what decisions by yourside」，失戀又有咩好怕喎，有班好姊妹喺身邊就足夠了啦！
Elaine有姊妹陪，而男友就同朋友去尼泊爾禪修、打坐。
睇嚟Elaine今次都好傷心，仲同前室友龔嘉欣一齊去旅行療傷。
希望Elaine今次可以放低傷痛，重新起程啦！
前往瀏覽完整內容:
