中年好聲音︳爭入決賽形勢分析 李佳龍婷穩陣 支嚳儀周吉佩出局高危

《中年好聲音》完成第3輪累積排名計分賽事後，「港版韓紅」林鉫徫以第8名正式「畢業」，下一集最後一場計分賽後將會得出決賽6強選手。

上集節目尾段的計分牌顯示，龍婷嘅排名得分有25分（電視畫面計多2分成27分），暫時領先現時第6名、有18分嘅周吉佩7分。除非龍婷下集演出失準排包尾只得4分，同時周吉佩要成為全晚最高分兼MVP拿下12分，加上排龍婷後面嘅吳大強、羅啟豪同顏志恆都得到前4名，先至有可能跌落第6名。如果真係發生呢個情況，龍婷會有29分，現時有15分排第7名嘅支嚳儀根本無可能超越，所以龍婷嘅入圍資格相當穩陣。至於現時排第一嘅李佳（29分）分別領先周吉佩同支嚳儀11分同14分，根據計分制基本上已入硬決賽。

至於出局高危人選方面，支嚳儀、周吉佩同吳大強除非下集成為最高分嘅三甲，否則難以超越同樣有22分嘅羅啟豪同顏志恆。而支嚳儀更要喺排名分上至少比周吉佩拎多3分，聽落並非唔可能，但就要有超水準表現先得。因此，周吉佩都並非「坐定粒六」打入前六。至於被網民指獲「保送」入決賽嘅吳大強，假如再次同上集一樣排包尾，加上被周吉佩同支嚳儀喺排名分上拎多過佢1分或4分，就真係保都保唔住，不過呢個情況機率比較低。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！