中年好聲音︳爭入6強賽事歌單曝光 支嚳儀吳大強各有問題危危乎？

《中年好聲音》今晚播出最後一場爭入決賽嘅計分賽，主題係歌手合唱賽，並以累積排名分數決定出場次序。各參賽者合唱曲目率先曝光，分別係︰

《一路上有你》李佳+谷婭溦

《一切也願意》龍婷+彭家麗

《我的快樂時代》顏志恒+吳浩康

《不要重播》羅啟豪+張崇德

《Tonight I Celebrate My Love For You》吳大強+韋綺姍

《留住我吧x情人》周吉佩+雷有輝

《Can’t Take My Eyes Off You》支嚳儀+林二汶

暫時領先前2位嘅李佳同龍婷，累積分數大幅拋離其他5位參賽者，入決賽相信無難度，但係根據錄影現場消息，佢地都交出高水準演出，龍婷同彭家麗更以唱跳演出備受讚賞。

反觀要保住「前6」、暫時包尾嘅支嚳儀，錄影前幾日不幸失聲，好在比賽當日稍為好轉，佢更加話就算走音都要唱。而排尾三嘅Bill 哥哥吳大強被安排同歌唱老師韋綺姍合唱，反而因為太緊張演出水準，令到Rita老師都話搞到佢好大壓力。至於稍為領先嘅顏志恆再次被批評咬字不清，會唔會令佢排名下跌？

今集評判陳潔靈向來要求高，但係據知有2組演出得到90分以上！根據現時排名，現時排第一嘅李佳有29分，龍婷有25分排第2，羅啟豪同顏志恆同得22分並列第3。排第5、6及7名嘅吳大強、周吉佩同支嚳儀，除非今集成為最高分嘅三甲，否則難以超越羅啟豪同顏志恆。而支嚳儀更要喺排名分上至少比周吉佩拎多3分，先至逃過出局命運。至於被網民指獲「保送」入決賽嘅吳大強，假如再次同上集一樣排包尾，加上被周吉佩同支嚳儀喺排名分上拎多過佢1分或4分，就真係保都保唔住，不過呢個情況機率比較低。值得一提係，今晚《中年好聲音》會延後一小時喺9點半播出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！