中年好聲音︳被指賽果做馬 《東張西望》公布各回合評分 周吉佩靠必殺歌完勝李佳

星期日舉行嘅《中年好聲音 － 登峯之戰》，賽前大熱李佳被周吉佩擊敗，令唔少網民紛紛到TVB各社交專頁留言鬧爆，直指賽果有造馬之嫌，尤其是大會當晚只公布各評審嘅慢歌部份評分，快歌演出並無公開。《中年好聲音》監製陳俊聲曾表示當晚分數有會計師樓監票，強調賽果公正。

而尋晚TVB喺《東張西望》公開《中年好聲音 － 登峯之戰》各個回合評審俾嘅分數，再次重申分數係由黃龍德會計師事務所監察核實。

根據分紙，節目中有公布嘅慢歌部份得分，周吉佩以91分成為該回合最高分，「英國豪」羅啟豪排第2，大熱嘅李佳同龍婷分別被周吉佩拋離5分及7分。至於首次曝光嘅快歌分數，喺慢歌部份得分「包尾」嘅顏志恆，快歌環節選唱《拒絕再玩》而得到91分，係呢part最高分。李佳同周吉佩以90分並列第2，而拎到88分嘅龍婷同吳大強同分並列第4，同周吉佩嘅分差再次被拉開。即使網上人氣最高嘅龍婷得票最高，全取觀眾投票嘅20分﹐而周吉佩喺呢part只有15分，加上羅啟豪喺快歌失分較少，最終龍婷三甲不入。

至於最後「二決一」嘅自選必殺歌部份，周吉佩唱出《愛很簡單》得到6位評判俾19分﹐包括向來手緊嘅「折扣王」伍仲衡。反之，李佳呢個回合只能夠喺張佳添手上，拎到比周吉佩高嘅分數，呢回合評審總分已經以95比92落後，加上觀眾投票方面周吉佩都贏埋，令吉吉以4分之差勝出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！