【九龍城重建】30 年活雞檔成遊客景點 玲姐樂見明星街市重建 弟憂獅子山風景不再

【Yahoo 新聞報道】玲姐可謂九龍城街市的靈魂人物，大時大節總會「著靚靚」受訪，笑談街市行情。她與弟弟周先生拍住上，在這個「明星街市」經營雞檔，恍眼 30 多年。在啟德機場年代、禽流感尚未襲港之時，該檔售賣活雞的盛況曾經吸引外國遊客觀摩。對於九龍城街市將會重建，兩姐弟樂觀其成，但周先生同時感慨眼前風景也許不再一樣，「而家一望出去就見到獅子山，第日可能就會畀高樓大廈遮晒喇！」

記者：Carmen C.

攝影記者：Davies

玲姐與弟弟周先生的雞檔「周華記雞鴨」在九龍城市政大廈（俗稱九龍城街市）面向衙前塱道的入口，周華就是她們父親的名字，由兩姐弟繼承家業。周先生斯文有禮，鮮有上鏡受訪，他笑道：「我係全職打雜，要去送貨，玲姐就喺度助陣囉！梗係影個靚㗎啦，唔好污染鏡頭吖嘛！」

「街市幾耐，我哋就幾耐」

「周華記雞鴨」60 年代在鐵皮搭設的九龍城臨時街市經營雞檔。周先生記得，當年檔販「擺低啲嘢喺衙前塱道地下就賣嘢㗎喇！」整條街熱鬧非常，「啲車入唔到嚟㗎，一入咗嚟就會出唔到去，因為（檔販）塞住晒」。雞檔至1988年遷入剛落成的九龍城街市，兩人因母親退休遂正式接手經營，「街市幾耐，我哋就幾耐」。

玲姐20多歲時在九龍城街市接手打理雞檔，回想初次殺雞可謂「雞手鴨腳」，以為成功替雞放血怎料「鋸唔到條喉（嚨）」；將雞隻放入熱水輕燙拔毛時，雞隻不斷掙扎抖動，「嚇到我冚住個蓋囉，嗰晚返屋企瞓覺呀，驚到不得了……驚到你死呀！」熟能生巧，玲姐很快就成為劏雞能手，三兩下手勢便能處理活雞，快而整潔。

在啟德機場年代，有外國遊客專程到九龍城街市參觀玲姐的雞檔，一睹外國罕有的售賣活雞場面，「好好笑㗎！成團廿幾人，見到啲雞郁就會企喺度影相」，有些遊客更會與玲姐一同合照，成為獨特的街市風景。周先生最難忘97年禽流感襲港，當時需要停市，亦為雞販帶來新的清潔標準，及每晚6時前需屠宰當天活雞的規定。周先生與玲姐的雞檔現時仍有活雞出售，包括本地嘉美雞、皇健雞等。

名人食家光顧 「周潤發嚟就梗係開心」

九龍城街市在不少人眼中是「明星街市」，不少名人和食家均會來購買食材。周先生認為該街市特別在食材出售種類多元化，質素亦較高，「買斤菜返去都唔太使點摘就煮得」。他們的雞檔店也貼上不少玲姐與名人的合照，包括蔡瀾、周潤發、李家鼎、黎耀祥；還有周潤發為玲姐拍攝的個人獨照。談起發哥，她笑逐顏開，「周潤發嚟就梗係開心啦！」

周先生對街市將會搬遷持樂觀態度，「始終新街市啲配套會新啲，通風又會好啲，有個新嘅希望」。玲姐就對街市的搬遷計劃甚有興趣，記者告知街市或會遷入新建大樓時，她笑稱「發達咯、發達咯」。九龍城放眼盡是數層高的唐樓，也許將會換成萬丈高樓，周先生坦言不捨眼前風景：「而家行出去抬起頭就會見到獅子山、藍天白雲，你出旺角（大廈之間）得個窿仔點望到？我諗遲啲就會無，都會懷念，因為係九龍城嘅特色」。