五歲大女夠獨立錢嘉樂湯盈盈貼身湊細女

東方新地 - 娛聞

更新日期： 2018年6月2日上午7:00

下個月就滿43歲的湯盈盈，一直想趕在45歲前為老公錢嘉樂追個慈姑，不過，本身要忙拍處境劇《愛・回家》，又要湊住兩個囡囡，已經忙到冇時停，追仔大計只好一拖再拖；幸好，剛滿5歲的大女凱晴Alyssa非常乖巧，除了是校內優異生，性格又夠獨立，唔使爸爸媽媽操心，令嘉樂盈盈可以放更多時間貼身湊細女，兼做足準備追多個。

日前，嘉樂一家四口，連同嘉樂父母三代同堂溫馨出巡，陪兩個囡囡去公園遊樂，只見嘉樂同盈盈全程緊張湊住兩歲細女凱琪，相比黐身的妹妹，五歲大女凱晴就相當獨立，見爸爸媽媽掛住擒入草叢同妹妹影相，更加會走開自己玩，唔會扭計同妹妹爭寵！

撰文：東方新地｜圖片：新傳媒圖片庫、湯盈盈IG

錢嘉樂有女萬事足

52歲錢嘉樂同42歲湯盈盈結婚六年，先後誕下兩個得意囡囡，大女凱晴已經五歲，細女凱琪亦兩歲半，雖然16年復出拍處境劇《愛・回家》過戲癮，但盈盈仍將家庭放首位，乜都湊女行先。據知情者透露：「一路都有監製搵盈盈拍劇，但為咗照顧兩個囡囡，佢全部都推晒，前年復出拍《愛・回家》，盈盈都係想過吓戲癮，話晒拍處境劇時間穩定啲，佢可以多啲時間留喺屋企湊女，其實教兩個女功課，又要照顧佢哋飲食好辛苦，盈盈好珍惜同囡囡嘅親子時間，會同囡囡一齊整嘢食同做勞作，佢覺得小朋友嘅成長過程好重要，做媽咪一定要陪佢哋逐一體會，就算嘉樂工作再忙，盈盈都一定要老公盡量抽時間湊女，唔可以疏忽兩個女嘅成長。」

湯盈盈（@tong_ying_ying）分享的貼文於 PST 2018 年 2月月 13 日下午 10:27 張貼

兩個女都係公主控，嘉樂盈盈在2018第一天，就陪兩個女兒入主題公園玩迎新年，嘉樂盈盈更戴上米妮及蝴蝶頭箍氹女，大女凱晴似足爹哋，細女凱琪就似媽咪。

湯盈盈（@tong_ying_ying）分享的貼文於 PST 2018 年 1月月 1 日下午 6:46 張貼

因為兩個女最愛去主題公園玩，錢嘉樂湯盈盈陪女兒入住新酒店，難得嘉樂趕完電影埋尾，可以陪老婆湊女，盈盈開心喺IG留言：「很開心爸爸都有時間來！」

湯盈盈（@tong_ying_ying）分享的貼文於 PDT 2017 年 6月月 13 日下午 8:31 張貼

做公主慶生

今年三月大女凱晴五歲生日，盈盈專登安排在主題公園搞生日會，請齊好友幫囡囡慶生，更幫囡囡換上公主裙，一圓女兒的公主夢。

湯盈盈（@tong_ying_ying）分享的貼文於 PDT 2018 年 3月月 11 日下午 7:01 張貼

湯盈盈（@tong_ying_ying）分享的貼文於 PDT 2018 年 3月月 11 日下午 6:46 張貼

湯盈盈大女五歲生日大搞公主派對

好姊妹周家蔚及大仔細仔、鍾麗淇與大囡細囡等好友也有出席，非常熱鬧。佢哋仲去咗「皇室庭園」，幫一班子女cosplay，化身成迪士尼公主同王子！

湯盈盈：非常愛你！

Alyssa扮睡公主，妹妹錢凱琪（Kassidy）則扮灰姑娘，周家蔚囝囝亦穿上王子衫。湯盈盈在社交平台上載照片，留言：「5歲生日快樂公主Alyssa ，5歲了，非常愛你！」

Alyssa揀扮睡公主，佢照鏡時特別開心，看來好滿意自己的造型呢！

錢嘉樂與湯盈盈婚後育有兩位千金，早前TVB在面書專頁恭喜湯盈盈佗第3胎，不過她已否認，稱是一場誤會。

鍾意嗲爸爸

錢嘉樂曾公開大讚老婆湯盈盈夠體貼細心，自己亦在老婆影響下，更懂珍惜關心家人。嘉樂讚盈盈不單緊張兩個女，又好關心他的爸爸媽媽，令他學識要珍惜家人！嘉樂話：「佢連菲傭姐姐都話要同對方多啲溝通，了解佢心態，我以為出糧就得，但佢就好在意人哋感受！」的而且確，湯盈盈成功令以往貪玩大唔透的嘉樂修心養性，自從兩個女兒出世後，嘉樂更加有女萬事足，不用工作就享受家庭生活。據好友透露：「自從兩個女出世之後，嘉樂變咗住家男，一收工就話要趕返屋企湊女，假期就一定family day，見親朋友又講湊女經，依家細女先得兩歲半，好鍾意嗲爸爸，嘉樂一見個女就已經冧爆。每次佢出埠做嘢，兩個女都要同佢FaceTime，嘉樂又點會唔冧吖！」

錢嘉樂湯盈盈 — 錢嘉樂一家四口帶埋父母三代同堂家庭樂，陪兩個寶貝女去寓所附近的賽西湖公園玩，期間路過叢，嘉樂更開心抱住細女凱琪入草叢影相，盈盈就即刻攞相機充當攝影師，幫兩父女攞個靚角度影低開心時刻，反而五歲大女凱晴好獨立，企開睇全程冇扭計。

大女攞學業獎

出世至今，大女凱晴樣子同嘉樂成個餅印，原來連性格亦似足爸爸咁豪邁開朗，平日好少扭計，自從妹妹出世之後，凱晴亦愈來愈獨立。知情者謂：「盈盈要湊住兩個女其實都幾辛苦，好彩大女好乖好生性，好少會同妹妹爭寵，有時見爸爸媽媽緊張湊住妹妹，佢都會自己玩，細細個已經好獨立，玩完玩具又會自己收拾，上個學期喺學校攞埋學業獎，可以話係品學兼優，盈盈不知幾開心！」

湯盈盈（@tong_ying_ying）分享的貼文於 PST 2018 年 2月月 4 日上午 3:04 張貼

推瘦身代言

六月就滿43歲，享受家庭生活又鍾意小朋友的盈盈，亦想盡快追多個，趕緊為錢家生個慈姑椗。據知情者透露：「盈盈好鍾意小朋友，已經有咗兩個囡囡，都想追個仔，成日同好姊妹周家蔚研究生仔秘方，又搵中醫調理，雖然嘉樂冇畀壓力佢，但自覺年紀都唔細，所以都有啲心急，之前有瘦身公司想搵佢減肥做代言人，盈盈都拒絕咗，唔想喺做代言期間唔可以懷孕，等生3胎，唔想再拖。」

陪兩女玩韆鞦

日前，終於完成手頭電影工作的嘉樂，亦爭取時間湊女親子樂，嘉樂先同大女凱晴及父母去寓所對面餐廳吃午餐，而當日要出席《愛・回家》宣傳的盈盈，做完活動即火速歸位，再一家四口連同老爺奶奶出動去賽西湖公園，陪兩個囡囡家庭樂，公園內有唔少遊樂設施，兩個囡囡不知玩得幾開心，盈盈樂樂陪著兩女玩韆鞦，話晒細女只得兩歲半，兩公婆特別緊張睇到實，怕佢唔小心跌倒，反而大女就好獨立自己玩，玩了一輪，見長髮披肩的大女流晒汗，盈盈又細心幫囡囡紮辮，玩了個多小時非常盡興，一家人又慢慢散步行返屋企。當嘉樂路過草叢，又開心抱住細女擒入草叢影相，盈盈即緊張負責揸機影父女合照，見爸爸媽媽掛住同妹妹影相，個性獨立的大女又自己行開玩，只見嘉樂完全被兩歲細女溶化，之後更畀細女騎埋膊馬，沿途行返屋企，慈父上身冧到爆！

約瑩瑩母子睇Peppa Pig

早前姚瑩瑩帶住6歲囝囝Evan同湯盈盈三母女一齊去欣賞人氣卡通《Peppa Pig Live! Peppa Pig’s Celebration》舞台劇嘅亞洲巡演香港站，怕醜仔Evan影相時都好緊張，相反媽咪姚瑩瑩好享受同囝囝親子樂，全程笑到四萬咁口，睇嚟仲興奮過囝囝咁喎！

姚瑩瑩湯盈盈 — 湯盈盈仲一湊二，帶埋佢同錢嘉樂兩個囡囡，五歲嘅錢凱晴(Alyssa)同兩歲嘅錢凱琪(Kassidy)一齊到場。

雖然影相時都怕怕醜醜咁，但難得有機會同Peppa Pig合照，6歲嘅Evan都有輕輕咁伸出手仔，捉住Peppa Pig大手一齊留影，好有紀念價值！

TVB爆再懷孕湯盈盈否認陀第三胎

上星期，TVB的Facebook臉書專頁上載了盈盈同4歲大女Alyssa去做親子手作嘅短片，標題寫上【恭喜湯盈盈再度懷孕！】，內文又打咗句「恭喜盈盈又有喜啊！」，不過之後這標題好快被刪掉，但就保留咗「大家姐嘅囡囡Alyssa(錢凱晴)同Kassidy(錢凱琪)應該都好期待有其他兄弟姊妹喇」，個個都以為盈盈有咗，但未夠3個月未能公佈喜訊！但當事人之後澄清唔係有咗，話只係佢哋搞錯咗！

湊女親力親為

現年已42歲的盈盈，平時親力親為照顧兩個女，再陀B體能上絕對應付得到，不過生仔唔係話中就中，所以年中已開始調理好身體與作息時間，希望半年內會懷孕成功，所以好姊妹鍾麗淇生日開Party，盈盈未見出席。而錢嘉樂最近完成在台灣拍攝的古惑仔電影《黃金兄弟》，亦留港休息配合造人大計。

送樓最實際

盈盈負責生B，錢嘉樂就負責搵奶粉錢，近年在電影圈甚為吃得開的他，中、港、台周圍飛拍電影，又與鄭伊健、陳小春等巡迴各地開古惑仔演唱會，對於盈盈勞心勞力照顧兩個女與頭家，錢嘉樂心存感激，仲用行動來證明，「畀獎金！數百萬當係碎銀！」的錢嘉樂早年以1,280萬買入北角寶馬山豐林閣一個七百幾呎的單位，最近又花過千萬入市，買了一個港島半山單位給愛妻盈盈當獎勵。

知情者透露：「盈盈好神秘，只係話好開始老公送咗贈樓畀佢，唔肯講喺邊度，只係知位於港島區半山，價錢亦係天價，佢話地方大過依家住嗰度好多，買定都啱喇，因為生埋第三胎一家五口，仲有最少兩個工人，一屋咁多人真係要四、五間房先夠住。」錢嘉樂錫老婆就係人都知，口甜舌滑的他，識得送樓最實際，氹得盈盈心花怒放，願意放棄幕前事業做其湊仔婆。

事實上，盈盈生完細女都無刻意修身，是因為她有意在年內生第三胎，所以想生完封肚一次過回復美好身段。而根據過往兩胎的紀錄，盈盈每次陀B都變重量級孕婦，因為媽媽好吸收，所以有咗唔夠三個月已露餡，而鬼妹仔性格的盈盈，對所有大肚婆禁忌都百無禁忌，所以陀仔陀得特別輕鬆。

上年11月10日，盈盈下午3點與細女凱琪離開寶馬山寓所，到北角上興趣班，雖然有外傭同行，但2歲的凱琪非常黐媽咪，經常纏著盈盈要抱抱，面對可愛的囡囡出嗲功盈盈亦難以招架。當日所見，盈盈黑色背心加leggings，外穿鬆身恤衫，身形豐滿的她孕味都幾濃，唔講仲以為有喜。

坦言期待第三胎

去年11月12日晚上，湯盈盈一家四口出席親友在北角酒店舉行的婚宴，見記者在場採訪，錢嘉樂先單拖走出門口接受訪問，對於有指將會迎接第三胎，錢嘉樂話想等女兒大一點才追多個，後來盈盈亦加入訪問，兩公婆十指緊扣愈講愈興奮，錢嘉樂更鮮有地大講與囡囡的生活點滴及教育方向，還向記者投訴兩個女在家以全英文對話，玩死英文唔好的錢嘉樂。