交換禮物 曖昧癡纏 張敬軒獻身任林家謙亂摷

張敬軒第二場紅館演唱會請得跟他「撞面」的林家謙任嘉賓，兩人在台上交換聖誕禮物，家謙貼心送「糊塗果醬」免軒仔捱白麵包之苦後，又表現「癡纏」開口要軒仔送樓，雖未能如願，但軒仔特准他當眾拆禮物，並伸手入衫內幫他寬衣，全場起哄。

張敬軒為跟歌迷倒數迎聖誕，特別於前晚9點半才舉行《The Next 20 Hins Live in Hong Kong張敬軒演唱會》，他以「好特別」來形容擔任嘉賓的唱作歌手林家謙：「未見過有一位嘉賓咁唔話得 ，將綵排錄音send畀佢，佢竟然唱番個編埋嘅和音版畀我。」

獲贈糊塗果醬

家謙稱揀平安夜上台全因為送果醬，他說：「我見你咁淒涼，成日食白麵包，呢幾樽嘢有少少似你啲建築材料，呢樽係開心果叫糊塗（胡桃）呀！每日3次每次2匙……」引來全場爆笑，軒仔亦笑納：「冇諗過自己嘅早餐會多咗份『愛的滋潤』，樽嘢啲顏色唔係咁開胃，不過食落去，最尾出來顏色都係差唔多。」

到家謙獨唱部分時，他以不慣現場太多人為由，拉着軒仔不放手，軒仔笑說：「你搞咩講到咁曖昧，你知道㗎，你要咩我都應承你㗎……」家謙乘機開口：「我要樓啦……我要……」之後快將踏入聖誕節，軒仔換上一襲Bear Bear服裝，家謙再次上台一起倒數，軒仔稱準備禮物給家謙，叫他站在面前幫手除衫：「過嚟拆禮物啦，喺中間伸隻手入去就得喇！」逗得觀眾不停狂叫。

工人跌倒受傷

完騷後，有工作人員清掃舞台時不慎於樓梯跌倒致手部擦傷，送往醫院檢查，英皇演唱會部總監馮貽柏表示：「位員工暫時冇大礙仲觀察中，軒仔都關心件事，多謝大家關心。」