8間人氣雲南米線合集！特色黃鱔小鍋米線、豬扒酸辣米線

唔知由幾時開始，雲南米線呢款食物突然喺香港變成主流，酸辣同麻辣嘅湯底令人愈食愈上癮，而且又經濟實惠，可謂平民美食呀。鍾意食米線嘅朋友每個人心中都一定有自己嘅心水最強米線名單，今期開飯仔都搜羅咗8間米線店畀大家，睇下有冇邊間係你至愛～

米線足料濃香+必食涼拌墨魚頭 雲家小鍋米線 

最高峰期曾經要排兩個鐘先食到！米線有得揀酸辣/麻辣，煮到好入味但又唔太淋，而且超足料。配料方面腩肉、炸醬同魚肉春卷都好多人叫，當然一定要食招牌小食涼拌墨魚頭，鋪上滿滿蒜蓉帶酸味，惹味開胃。

網民聲稱最強米線 雲南小鍋米線

石蔭25年老字號，畀米線關注組稱為最強米線，到底有咩咁巴閉？湯底唔屬於好濃郁好紅果種，但同時集酸、甜、鹹於一身，食落一樣夠濃味但唔太鹹又唔油。第一次去嘅可以試皇牌米線，有齊最招牌配料包括雞絲、腩肉同螺旋藻，雞絲同螺旋藻索晒湯；腩肉肥瘦相間好入味，紅得有道理！

荃灣人龍店 老闆娘雲南米線

無人不曉，永遠都排晒長龍嘅米線店～呢間就啱晒重口味人士，麻酸辣湯完全滿足晒又想食麻同酸嘅朋友，首先食到酸味，後勁麻味好重。蒙古湯都好特別，孜然粉同香料味道好突出。配料嘅話炸物好出色，如酥炸雞球、 反斗蝦膠豆卜同野菌腐皮卷等，好香脆。

招牌豬扒酸辣米線 阿一豬扒酸辣米綫

睇個名就知道主打豬扒米線啦～湯底係酸辣唔會太濃，比較清爽，米線選用粗米線頭，有咬口得嚟有香濃米味，有驚喜！豬扒當然係必叫，軟腍入味仲食到肥膏香添～

屯門人的回憶 雲貴風正宗雲南米線

被屯門人稱為紅橋米線，呢間一樣係啱鍾意濃味同辣嘅朋友仔食～湯底好濃郁，配料方面一定要試下佢嘅麻辣系列，有麻辣雞肉、麻辣豬耳同麻辣豬頭肉等，辣得好過癮！

清爽酸辣湯底 貴香園

旺角呢間小店都開咗有十年，主打雲南米線，亦有薯粉同涼皮，湯底主要係酸辣同麻辣，辣度分7級，佢嘅酸辣湯底偏向清爽派，但同時都好夠味，推介大家食豬軟骨，好腍又入味。

人氣麻辣雞 麗江雲南米線

天水圍區內最受歡迎嘅米線小店，麻辣湯底嘅味道好有層次呀，食完之後嘴巴會有少少麻痺感覺，會愈食愈上癮～小食必叫招牌麻辣雞，好惹味呀。小食方面氣鍋雞值得一試，嫩滑有雞味。

深水埗米線老店 雲南風味過橋小鍋米綫

有三十年歷史嘅米線老店，最出名一定係黃鱔小鍋米線，黃鱔用濃濃嘅醬汁煮到好入味，少少微辣好過癮，除咗黃鱔，仲有完全吸收哂精華嘅豬皮，坊間真係好少地方食到呀。

文: Yanica