【仲有3個禮拜】解放軍退役軍官前年話︰2020年前武力統一台灣

 

又到年尾,年頭講過嘅目標……算吧啦。更何況幾年前嘅預測?   今日睇返一則舊聞︰中國全國政協委員、解放軍前退役中將王洪光,喺前年3月接受台灣《旺報》專訪時表示,台海情勢非常危急,加上島內台獨民意成為主流,當時佢認為已經到咗武力統一嘅時候,而且時間係喺2020年前!   提提你,家陣距離2020年仲有三個禮拜多啲。   而王洪光又認為以解放軍實力,用飛彈同長程火箭炮代替傳統登陸戰,幾個鐘頭就可以搞掂位於台北嘅國防心臟-衡山指揮所。佢仲講埋解放軍航空母艦停喺台灣東面,就足以攔截美軍趕嚟嘅救援艦隊。   有信心到一個點!連戰術都公開埋呀。靜靜地贏?我呸!   希望呢3個禮拜真係兩岸和平啦,打仗是不對的。   講返呢位王洪光,過去都有唔少霸氣言論,舊年《環球時報》年會上,佢話「100小時攻陷台灣」、「最多個幾禮拜我就可以喺台灣街頭飲凍頂烏龍茶」……咦,之前講過幾個鐘搞掂架,即係點先?   再講多次,我地熱愛和平最怕打仗,但阿王中將嘅豪言會唔會成真?用最老套嗰4個字埋尾︰拭目以待。原文傳送門