借藝人錢冇還 Simon蒲頭唔認騙徒:冇人追我錢

·2 分鐘文章
借藝人錢冇還 Simon蒲頭唔認騙徒

昨日東網爆出無綫多位台前幕後被走數,其中同樣中伏的無綫導演Eddie爆料,指人稱「Simon」的前TVBI經理,自2009年開始向他借錢,前後借款共13萬元,因有人久久未清數,故於日前報警求助,原來「Simon」更曾以不同原因,向多位藝人包括林夏薇及莊思明等埋手借錢。

捲入借錢不還風波,Simon終於「現身說法」,今日接受東網訪問,承認因經濟問題,先後問過多位藝人朋友借錢,但他多次強調自己並不是偷呃拐騙,否認是騙徒,雖然現時誠信破產,但並非不負責任,又感謝為他紓困的藝人朋友。問到Simon為何不還錢給導演Eddie、林夏薇及林盛斌等人時,他說:「其實我個電話一路都冇改過,入行到依家都係呢個電話號碼,Eddie冇同我聯絡過,佢冇追過我,受害人可以心平氣和同我傾。(佢報咗警喎!)咁警方有冇受理到?有文件、證據可以攞出嚟。」

問到Simon為何不主動聯絡借錢給他的「債主」朋友,他聲稱是電話問題:「我之前啲電話冇back up,我換電話時好多電話冇咗,舊同事部分電話都冇咗,其實話我搞到啲人中伏係乜嘢意思呢?我係同佢哋有個deal,話settle咗、環境許可下我就會還錢,呢2、3年自己經濟陷入低潮,冇一個藝人追過我錢,咁我又何謂騙徒?」

Simon多次強調跟藝人「有deal」有協議,直言不認為他們是中伏:「大家係有個deal,唔屬於中伏。(唔用中伏咁用乜嘢詞語形容?)我唔知,因為我唔係專業。」再問他打算何時還錢給涉事的台前幕後包括Eddie時,他又說:「呢個我唔需要答你,呢啲係我同藝人個deal,工作同環境許可下,我會逐一歸還,我Simon唔係一個借錢唔還嘅人。」

他又指如果大家沒有他的電話號碼,可以透過多個社交平台聯絡他,又表示歡迎導演Eddie致電給他,對於Eddie已報案,問到Simon會否擔心時,他說:「唔擔心,偷呃拐騙入面,我唔屬於任何一樣,係大家你情我願下借畀我。我都想同所有藝人、受影響嘅人致歉。」