做第三者唔係唔得，係唔好咁串啫

根據非正式統計，每三個人之中就有一個人曾經被發現有外遇。而另外嗰兩個，就係好好彩沒有東窗事發而已。

喺第三者呢樣嘢上面，好少人係完全清白。即係唔好同我講你從來連諗都無諗過呀？係嘅話請劉明，我想填form。所以我理解，有時真係timing問題，後來者居上都無計。而值唔值得為「忠貞」兩個字而放棄有可能係一生中嘅最愛，見仁見智，反正都係賭一鋪架啫。最緊要係條路自己揀，仆街唔好喊。

但就係有個問題：你做人小三又好、自己收埋個小三又好 —— 可唔可以唔好咁串呢？

喂其實真係無嘢架喎，偷食／婚外情又唔犯法嘅（嗱溫韾提示，通姦係可以成為離婚訴訟嘅證據，可大可小。如果閣下咁不幸有需要嘅話記得請教Google）。但洗唔洗咁串先？做第三者嘅，人你就搶咗喇，彩都要攞埋？又食又拎你有無俾加一服務費呀？

如果，如果你仲有少少人性……唉算喇，講記性喇好未？拋棄人嘅你，大概會記得當初熱戀期嗰陣又乜又物愛你一世BB豬嘅心情，或者係情到濃時想許下一生承諾嗰股衝動。雖然你已經完全忘恩負義ed，無辦法記返起自己以前有幾愛面前呢個陌生人，但唔該你想像吓，就係而家企喺你面前嗰個人，佢對你嘅心意仲係停留緊好多年前，即係你都曾經有嗰種激情同感受。

然後，你好似唔記得講返句唔該，就突然移情別戀，得返人哋一個企喺原地不知所措，傷心痛哭。

感情無分對錯，我知你一定會用呢句對白架喇。啱架，無話邊個欠咗邊個，所以失戀／失婚過後振唔振作係佢自己同身邊朋友嘅事，與你無尤。之但係你唔洗話踩佢幾腳架嘛？有小三，可能你唔知啦，呢壇嘢喺現今文明仲係受千夫所指架，咁你低調啲、講嘢細聲啲、Facebook校暗啲唔好咁閃，有無咁難先？洗唔洗打去社署熱線等人協助你？唔即刻向外（或者向前度）公布甜蜜戀情係唔會少咗忽肉架嘛？但你咁樣對佢，佢真係痛到好似少咗忽肉咁架喎。

而家唔係講緊咩道德高地，淨係叫你捅完人，唔好急住想拎返把刀返屋企切牛肉，俾少少時間人哋處理傷口咋。

好喇，其實我底線都相當低，前面講嗰啲都可以算數嘅。咁你放完閃喇，或者正經八百地同前度描述完「新歡有什麼吸引之處，試闢述之。（10分）」，你唔好走嚟好似發現新大陸咁 —— 點解大家都咁憎我嘅？無理由架，我做錯咩呀？係咪你周街唱衰我？

若要人不知，唔好太低B呀兄台。

************************************

網絡作家B612 – facebook專頁： b612lpp

（鍾意睇嘅去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」