傳李思捷回巢TVB主持全新遊戲節目 網民怒批：全世界得佢以為自己好笑

李思捷早前接受傳媒訪問表示自己將推出新歌，亦會再返電視台主持新節目，被問到詳情時，佢就大賣關子指未必係TVB，可能會係ViuTV都唔定；不過近日就有傳李思捷將回巢TVB，主持全新遊戲節目《思家大戰》。

據指，TVB購入美國人氣遊戲節目《Family Feud》版權，開設香港版本《思家大戰》，如美版一樣由主持人李思捷向每集嘉賓提問有關社會、娛樂等生活問題，並加入100位觀眾街訪，嘉賓需於限時入面競猜民調結果，以爭取終極大獎。嘉賓方面，有傳已暫定分為「星級家庭組」、「劇組／節目／電影／樂壇」 組合類」以及「圈中閨密兄弟班」。

李思捷自從2019年播出嘅劇集《她她她的少女時代》後，同王祖藍、阮兆祥舉行廣州《福祿壽十周年演唱會》，之後活躍於內地社交平台「抖音」，佢所分享嘅搞笑短片深得內地網民喜愛。反觀喺香港市場，雖然扮嘢能力獲讚，但觀眾緣就麻麻。曾經與黃心穎傳緋聞，被指姣婆遇著脂粉客之外，亦曾經被網民票選為「10大最乞人憎TVB藝人」第3名。網民亦喺網上討論區表示對節目《思家大戰》以及李思捷主持唔太有興趣：「李思捷最好笑既地方，就係全世界得佢一個以為自己好好笑」、「呢個電視台都真係幾有問題，已經唔係老唔老餅，而係呢堆人唔知醜」、「覺得李思捷會幫到手證明佢地真係活係自己世界入面」、「其實TVB明唔明點解你啲綜藝冇人睇，呢5-6年啲綜藝嘉賓全部TVB藝員圍威喂有咩好睇」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！