傳港姐再有4佳麗退選 準決賽得22人參加？

早前港姐次輪面試後，有幾位被傳媒認為外表質素唔錯嘅入圍佳麗紛紛退選。曾在2021年亞姐香港區競選獲「最上鏡小姐」嘅孫伊，今年都有參加港姐仲入到次輪面試，但係之後佢喺社交平台大爆喺第2次面試，睇完TVB百幾頁合同後就選擇退賽。孫伊話「看著那一百多頁的合約，其中我比較猶豫的就是總決賽一入選就要跟TVB簽5年，不能參與別的電台節目，不管拿獎與否。其次沒有入總決賽的會限制娛樂板塊的活動半年」。

即使條款頗辣，最終TVB都揀到26位佳麗參加準決賽。一如以往，候選佳麗正式見記者前，都會去大會指定髮型屋整頭。不過呢2日現身嘅佳麗只有21個，唔計因為學業而要返北京嘅「翻版范冰冰」王敏慈之外，即係話有4位佳麗「不知所蹤」。

根據傳媒估計，疑似退選嘅4位分別係「翻版蔣家旻」、黑top襯白褲表演拉丁舞嘅型女Ellie、著露肩裝面試嘅姜伊玲以及「黑絲女」Kiki。暫時未知佢地係自行退出，定係大會決定，又或者係咪另擇日子再去整頭。不過TVB好快就會安排佳麗見面，到時自然水落石出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！