《機場特警》58歲關禮傑入行逾四十年保養得宜家有索爆囡囡

東方新地 - 娛聞

2020年3月27日上午11:19·10 分鐘文章

《機場特警》搵嚟58歲的關禮傑「逆齡」飾演54歲的特警教官，這是他繼2011年無綫劇集《叛逃》內飾演的反恐特警隊教官沈Sir「沈志敖」之後，又一次飾演魔鬼教官，當年他曾向反恐特勤隊成員示範跨「跳樓」一幕，成為TVB膠劇情節恥笑經典。其實現年58歲的關禮傑(Eddie)，育有兩個顏值超班的索女兒，其中23歲大女關楓馨 (Fabienne) 有樣有身材，之前更傳佢被力邀入無綫拍劇，實行父女檔拍住上！

撰文：東方新地｜圖片：新傳媒圖片、Instagram

關禮傑保養得宜，凍齡樣貌實在令人羨慕！而關禮傑更育有兩個顏值超班的索女兒，其中23歲大女關楓馨 (Fabienne) 有樣有身材，之前更傳佢被力邀入無綫拍劇，實行父女檔拍住上。

84年入行《新紮師兄》青澀美男女人型

關禮傑憑1984年《新紮師兄》喬志豪 (好姐) 一角彈起，但因角色關係到90年結婚前一直畀人認為係「乸型」，相中嘅傑仔當年只有23歲，成個青澀花美男，加埋含春微笑，難怪坊間會有咁嘅感覺。

乸型學警變身魔鬼教官

關禮傑在《機場特警》飾演文永強（Man Sir, 54歲），係機場特警訓練及支援小隊督察/爆炸品處理課炸彈處理員，負責做魔鬼教練。

關禮傑《珠光寶氣》媾掂黎姿

與梁朝偉吳鎮宇同是第11期藝員訓練班學員入行的關禮傑，早年轉攻內地發展，直至2003年重返無綫不時在劇集演出被讚，《珠光寶氣》關禮傑演陳豪情敵，猛烈追求黎姿的報紙檔大叔，演出勁搶。

關禮傑索女被遊說選港姐

現實生活58歲關禮傑應該是「順流大叔」，除咗多年來外形keep 得好，仲有兩個顏值超高的索女兒，家庭幸福圓滿，大女關楓馨一直被無綫虎視眈眈。之前更傳早於前年Fabienne已經被無綫睇中，力邀佢參選港姐，只係當時Fabienne仍未完成大學課程，無綫始終過唔到老竇一關。事隔兩年，無綫一直未放棄，為咗唔想走寶，近日就出動重金利誘，密斟關禮傑帶愛女加盟無綫旗下，父女檔上陣拍劇！

家有索女初長成，早於16年已經有高層睇中，落力游說關禮傑讓又靚又高學歷的大女兒參選港姐。據知情者透露：「其實三年前已經有品牌搵楓馨出活動，Eddie (關禮傑) 都好贊成佢當玩票性質咁攞吓經驗，冇諗過個女一出嚟已經咁受關注，無綫嗰邊好快就𥄫中佢，啱晒港姐要求，就游說Eddie畀個女參選，除咗睇中楓馨樣貌夠標青，亦覺得星二代參選好有話題性，不過嗰時楓馨大學未畢業，Eddie覺得難得個女讀書叻，想個女完成大學課程先至諗！」

父女檔拍劇

近日無綫再落力游說關禮傑帶索女加盟父女檔拍劇。據知情者透露：「除咗班實力演員，其實TVB班監製，都好想用有青春有氣質嘅新面孔，以前Eddie成日會帶個女出嚟見班老友，傑嫂又會帶女去探班，班監製知道佢個女條件好出眾，個樣又夠甜美，加上楓馨前年大學畢業，依家可以話係最啱時機，梗係想簽佢入TVB啦！呢排無綫班高層就成日約Eddie出嚟密斟，話晒Eddie同無綫合作慣，仲提議佢哋父女檔一齊拍劇，等第一次拍劇嘅楓馨有爹哋喺度教路冇咁緊張，有監製仲話度身訂造劇本同角色畀佢哋㖭！」

學校風頭躉多人追

外表充滿陽光，性格爽朗的楓馨，除咗吸引到無綫高層垂青，身邊更不乏狂蜂浪蝶追求，曾經一度搞到爹哋關禮傑好頭痛。據知情者透露：「楓馨細細個已經成日畀人讚佢靚女，讀高中時已經好多狂蜂浪蝶喺身邊氹氹轉，作為父母，嗰時Eddie同老婆都好緊張，睇得個女好緊，成日同阿女講識到男同學仔都可以帶畀佢哋見吓，好彩個女好生性又識諗，對感情好專一唔係玩玩吓，同依家個鬼仔男友Kris，拍咗拖都幾年好穩定，完全唔使父母擔心！」

交女兒決定

對於女兒是否入行，關禮傑持開放態度，入行四十幾年，當然清楚呢行遊戲規則，幾好條件都要有運先得，所以佢將決定權交番畀個女。據知情者透露：「佢話最緊要個女鍾意，絕對唔會左右個女嘅諗法，會畀佢自己決定，上年楓馨去咗英國修讀碩士，佢話如果個女有興趣，佢唔會反對佢畀佢入行試吓，佢都覺得個女汲取社會經驗，樣樣試吓，先知乜嘢最啱自己，而傑嫂都好贊成個女入娛樂圈發展！」既然無綫誠意十足，加埋老竇關禮傑開綠燈，睇嚟無綫好快又多個花旦生力軍。

初露鋒芒

關禮傑同老婆梁安娜結婚28年出名恩愛，更育有兩個索女兒，兩個女未畢業已經被各界虎視眈眈！

帶女出巡

15年關禮傑帶埋兩個女一家四口出席仁濟除夕倒數派對，當時20歲樣子甜美的大女關楓馨已經惹傳媒關注。

母女檔

三年前20歲的楓馨曾玩票性質孖住媽咪一齊出席護膚品活動。

三條Queen

兩個女兒同媽咪如同倒模，家有三條Queen的關禮傑，家庭大滿貫都算人生勝利組！

關禮傑係「美魔男」，關太Anna亦唔係省油的燈，同樣keep得勁好，企埋兩個女身邊就好似三姊妹咁！關氏夫婦就將優良DNA遺傳晒俾兩個女兒，大女楓馨五官精緻，愈大愈靚，係繼上山詩鈉囡囡Hilary之後最索的星二代；雖然家姐好搶鏡，但妹妹佩盈原來都長得亭亭玉立，身形高佻，唔通呢啲真係「贏在子宮裏」？

在英國University of Southampton讀書的楓馨，終於學有所成，之前關禮傑舉家飛到英國參加其畢業禮。見到西裝骨骨的關禮傑，配襯吊腳褲非常有型，關太就同楓馨着母女鞋。而妹妹佩盈就染咗一頭近年至潮的銀灰髮，一家人行出街真係閃爆！

關氏三母女早前去咗日本旅行，見到佢哋去咗港人愛去的著名景點，包括伏見稻荷神社的千本鳥居、及嵐山的竹林小徑等留倩影，靚人配靚景美不勝收。楓馨就無謂多講，依然係索爆；而妹妹佩盈都好睇得，見佢箍完牙之後下巴尖尖，皮膚白晢，年紀小小但已經高過家姐同媽咪！

三母女仲一齊影貼紙相，夠晒青春！

年紀小六歲的佩盈比家姐還要高，手長腳長，一雙美腿好吸睛，企家姐隔離其實一啲都唔輸蝕！不過所謂「女大十八變」，下頁開始睇吓兩姊妹細個時係咩樣先！

先睇家姐楓馨，講真佢除咗有啲baby fat之外，外貌整體上分別不大，都係個美人！

楓馨以前感覺上有啲包包面，不過都係掩蓋唔到女神氣質，而且身材已經好有睇頭！

至於呢個好可愛的四眼妹妹… 無錯！佢其實就係小時候的佩盈！唔講真係認唔出！

睇番以前啲相，見到楓馨已經長得亭亭玉立，反而佩盈仍然係一個小妹妹似的，稚氣十足，而且戴住眼鏡，兩姊妹有好大分別！可能因為兩人年紀相差成六年，而且楓馨實在係出眾，導致佩盈有啲被比下去的感覺。不過正所謂「女大十八變」，兩人依家已經成為至索的星二代姊妹花。家姐就有意回流選港姐，唔知佩盈將來會唔會都想踏入娛圈？