再寸TVB捧千禧五虎 193＠ERROR︰仲用「五虎」呢啲字咁娘

上星期ViuTV搞「最後一屆口罩小姐選舉」，ERROR成員193（郭嘉駿）回敬曾志偉「Viu收視得4點，只可以同J2比」言論，直言大台「係畀老嘢睇架嘛」、「收視得幾百部電視機，我哋唔理好耐」，仲話「J2做咩架？係咪40幾歲仲話後生仔傾偈嗰個？」。尋日Viu又有大show「Chill Club推介榜年度推介20／21」，有份競逐嘅ERROR當然出席，估唔到見記者嘅時候193又再爆seed！

上次敢言過後，經理人花姐話會同193傾吓，193就承認真有其事，花姐認為佢講嘅嘢資料上無錯，但可以禮貌啲，193又澄清本來想講「TVB係畀老一輩嘢」，不過一時口快講咗「老嘢」。193又強調唔係針對曾志偉，自己好尊重前輩，見到面會打個招呼或者道個歉。

4人成軍嘅ERROR被問到點睇TVB嘅「千禧五虎」，193又再衝口而出話「而家仲用五虎呢啲字咁娘架咩？」，隊友阿Dee即刻俾反應「嘩！又嚟？」。而193喺上次「駁咀」之後，IG Follower人數跳升到17萬，仲多過姜濤，佢覺得好開心，仲話多咗人睇返ERROR以前嘅節目，希望大家繼續支持。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！