出「墊」術反串跳艷舞 陳展鵬硬膠咪神 同唐詩詠鬥姣

首次跳艷舞的唐詩詠遇上勁敵，對手竟是猛男陳展鵬！詩詠笑指對方反串造型「驚」艷，展鵬則自爆戴「硬膠」上陣，笑言詩詠都要「忌」他幾分。

無綫新劇《鐵拳英雄》昨晚首播，陳展鵬、唐詩詠、陳山聰與姚子羚等均以「真功夫」上陣，拳拳到肉。劇中不乏搞笑場面，觀眾欣賞視覺刺激之餘，亦會笑到碌地。

詩詠與展鵬將有諧趣表現，劇情講述詩詠為求達到目的，與展鵬一齊跳艷舞。女方造型鬼火咁靚，展鵬則反串上陣，搞笑度爆燈。詩詠昨日受訪時坦言從演以來首次跟男人爭妍鬥麗，大爆展鵬為了突出「騷味」，墊了多個「缽仔糕」：「展鵬真係好正，佢嘅女裝好『驚』艷。（你有冇攝Pad呀？）我冇呀！因為我本身件衫有，但佢就墊咗好多嘢喺入面囉！」

拍攝前剃腳毛

她指自己的艷舞裝很突破：「我未試過着呢一類衫，本身套衫同頭飾超重，不過真係好靚，多謝服裝同事咁有心機，一針一針釘啲珠片上去，同埋件衫實在太少布喇，拍嗰日我忍住冇食嘢！以前我唔係好識用個身軀去吸引人，但拍完呢場戲之後，我發現原來自己都幾正。」

至於展鵬表示為了反串演出，拍攝前特別剃清腳毛，「光管腳」上陣：「其實跳舞唔係重點，重點係喺身材上面。（詩詠爆你攝好多Pad？）點止Pad咁簡單？我啲身材咁平，直頭要塞晒硬膠啦！塞完真係眼前一亮，詩詠都即刻忌我幾分。」另外，詩詠好姊妹黃翠如由內地返港，2人即相約見面，並於社交網上載短片，見她們心情High爆，又攬又錫。